काठमाडौं । परराष्ट्र सचिव भरतराज पौड्यालले उमेरहदका कारण आज (मंगलबार)बाट परराष्ट्र सेवाबाट अवकाश पाएका छन् । 

उनले ९ अक्टोबर २०२० देखि परराष्ट्र सचिवको जिम्मेवारी सम्हालेका थिए । उनले करिब तीन वर्ष दुई महिना परराष्ट्र सचिवको जिम्मेवारी सम्हालेका थिए ।

केही दिनअघि मात्र सरकारले क्यानडाको लागि नेपाली राजदूतमा सिफारिस गरेका पौड्यालले ५८ वर्षे उमेरहदका कारण परराष्ट्र सचिवबाट अवकाश पाएका हुन् । 

“परराष्ट्र सचिवको रूपमा म एकदमै सक्रिय र क्रियाशिल रहे,” पौड्यालले बाह्रखरीसँग अनुभव साटे, “अनुभवको आधारमा मेरा लागि यो समय असाध्यै मूल्यवान रह्यो ।” 

परराष्ट्र सचिव हुनुअघि पौड्यालले सन् २०१६ देखि परराष्ट्र मन्त्रालयको संयुक्त राष्ट्रसंघ, अन्तर्राष्ट्रिय संगठन र अन्तर्राष्ट्रिय कानुन महाशाखाको प्रमुखका रूपमा कार्य गरेका थिए । उनले त्यतिबेला नेपालको बहुपक्षीय मामिला सम्हालेका थिए । 

उनले मन्त्रालयको नीति योजना, विकास कूटनीति र एनआरएन महाशाखा र प्रशासन महाशाखाको समेत नेतृत्व गरेका थिए । उनी सन् २०१६ मेदेखि परराष्ट्र सचिव नहुन्जेलसम्म परराष्ट्र मन्त्रालयको प्रवक्ता समेत रहेका थिए । 

सन् २०१२ देखि मे २०१६ सम्म पौड्यालले पाकिस्तानका लागि नेपाली राजदूतको जिम्मेवारी सम्हालेका थिए । सोही समयमा उनी अफगानिस्तान, इरान, इराक र टर्कीका लागि नेपालको गैरआवासीय राजदूत समेत रहेका थिए । 

यसअघि सन् २०११–२०१२ सम्म उनी दक्षिण एसिया र सार्क महाशाखाको प्रमुख रहेका थिए । सन् २०१० देखि २०११ को अवधिमा पौड्याल परराष्ट्र मन्त्रालय अन्तर्गतको राहदानी विभागको महानिर्देशक रहेका थिए । 

सन् २००६ देखि २०१० सम्म उनले स्वीट्जरल्याण्डको जेनेभास्थित राष्ट्रसंघका लागि नेपाली स्थायी नियोगमा उप–स्थायी प्रतिनिधिको जिम्मेवारी सम्हालेका थिए । 

सन् २००२ देखि २००६ सम्म उनले परराष्ट्र मन्त्रालयको उत्तरपूर्वी एसिया, युरोप अमेरिका र दक्षिण एसिया महाशाखामा रहेर काम गरेका थिए । पौड्याल सन् १९८७ मा नेपालको निजामती सेवामा प्रवेश गरेका थिए ।