काठमाडौं । भारतको नयाँ दिल्लीस्थित यौन गतिविधि हुने केन्द्रमा दुई नेपाली ‘युवती’ बेचबिखनमा परेको खुलासा भएको छ । भारतमा आकर्षक रोजगारीको प्रलोभन देखाई उनीहरूलाई त्यहाँ पुर्‍याइएको नेपाल प्रहरीको अनुसन्धानका क्रममा पत्ता लागेको छ ।

सो घटना अर्थात् मानव बेचबिखनमा संलग्न रहेको आरोपमा प्रहरीले बाँकेको बैजनाथ गाउँपालिका–८ की ३९ वर्षीया मुना ठकुरी भनिने मुनाकुमारी मल्ललाई पक्राउ गरेको छ । गएको बिहीबार प्रहरीले उनलाई नियन्त्रणमा लिएको हो ।

मुनाकुमारीलाई बाँकेकै नेपालगन्जबाट पक्राउ गरिएको प्रहरीले जनाएको छ । सुर्खेत, दैलेखलगायत पहाडी जिल्लाबाट महिलालाई भारतमा आकर्षक रोजगारी दिलाउने भन्दै त्यहाँ लगेर बेचिएको उजुरीपछि प्रहरी टोली खटिएको थियो ।

मुनाकुमारीले भारतमा घरको सरसफाइमा राम्रो कमाइ हुने प्रलोभन देखाई महिलालाई नेपालबाट लैजाने गरेको प्रहरी अनुसन्धानका क्रममा खुलासा भएको छ । उनले आर्थिक अवस्था कमजोर भएका र कम पढेलेखेका एकल महिलालाई ‘टार्गेट’ बनाउने गरेको खुलेको प्रहरीले जनाएको छ ।

पीडितलाई दिल्लीबाट अन्यत्र स्थानमा समेत यौन गतिविधिका निम्ति पठाउने गरिएको थियो । पीडित भागेर हिँड्दा समेत पिछा गरेर समाती पुनः सोही गतिविधिमा लगाउने गरेको खुलेको प्रहरीले जनाएको छ ।

मानव बेचबिखन अनुसन्धान ब्युरो बबरमहलको टोलीले जिल्ला प्रहरी कार्यालय बाँकेको समन्वयमा उनलाई पक्राउ गरेको हो । उनीविरुद्ध काठमाडौं जिल्ला अदालतबाट पाँच दिन म्याद थप अनुमति लिई अनुसन्धान भइरहेको ब्युरोका एसपी ज्ञानेन्द्रप्रसाद फुयालले जानकारी दिए ।