काठमाडौं । नेपाल सुपर लिग (एनएसएल) को दोस्रो संस्करणमा साविक उपविजेता धनगढी एफसी र बुटवल लुम्बिनी एफसीबीचको पहिलो हाफ गोलरहित बराबरीमा सकिएको छ । 

त्रिपुरेश्वरस्थित दशरथ रंगशालामा जारी रोमाञ्चक खेलको पहिलो हाफमा दुवै टिमले गोलका अवसर सिर्जना गरे पनि सदुपयोग गर्न भने सकेनन् ।

१९औँ मिनेटमा बुटवलका एरिक विष्टको फ्रिकिकलाई धनगढीका गोलकिपर मोहम्मद ताहाले मुश्किलले जोगाए । धनगढीका आशिष चौधरीले जिलेश्पीजंग कार्कीलाई लडाएपछि १८ यार्ड बक्सको राइट साइडबाट बुटवलले फ्रीकिकको अवसर पाएको थियो । जसमा एरिकको प्रहार ताहाले जोगाए । सोही रिबाउन्डमा धनगढीका अभिषेक गुरुङले आफ्ना साथी खोज्ने प्रयास गरेपछि बुटवलका सरोज तामाङले बल जित्दै गरेको डिफ्लेक्ट हुँदै पेनाल्टी बक्सबाहिर पुगेपछि धनगढीको खतरा टरेको थियो ।

२५औँ मिनेटमा धनगढीका अहमद हिजाजीले गरेको प्रहार पोस्टमा लागेर फर्कियो । आशिष चौधरीले लेफ्ट साइटबाट निकालेको कट पासलाई ताहाले पहिलो टचमै प्रहार गरेपछि ‘फर्स्ट बार’ मा लागेर बाहिरिएपछि धनगढी अग्रता लिनबाट चुकेको थियो । 

३६औँ मिनेटमा एरिक विष्टको कर्नरमा जिलेश्पीले गरेको हेडर धनगढीका अभिषेक गुरुङले गोललाइनबाट क्लियर गरेपछि बुटवल पुनः अग्रता लिनबाट विमुख भएको थियो । रिबाउन्डमा सेर्जे सङको प्रहार धनगढीका कप्तान देवेन्द्र तामाङबाट डिफ्लेक्ट भयो । सोही समयको काउन्टरमा धनगढीले मौका बनाए पछि अभिषेक गुरुङको ‘फ्री हेडर’ ले दिशा लिन सकेन । आशिष चौधरीले राइट साइडबाट बल अघि बढाउँदै फरवार्ड हिजाजीलाई खोजेका थिए । हिजाजीले क्रस निकाले पनि पेनाल्टी बक्सभित्र अनमार्क रहेको अभिषेकको हेडर पोस्टभन्दा बाहिरबाट हुँइकियो । 

४०औँ मिनेटमा बुटवलका सङले १८ यार्ड बक्सभित्रबाट गरेको प्रहार धनगढीका गोलकिपर मोहम्मद ताहाले मुश्किलले जोगाउँदै खतरा टारे ।