काठमाडौं । काठमाडौंको बबरमहलमा पैदलयात्री आफैँले बटन थिचेर ट्राफिक लाइट बाल्ने प्रविधि सञ्चालनमा ल्याइएको छ ।

बबरमहलस्थित जिल्ला अदालतअगाडिको सडकमा १० लाख रुपैयाँ लागतमा पैदलयात्री आफैँले बटन थिचेर ट्राफिक लाइट बाल्ने प्रविधिको ‘क्रसिङ’ राखिएको हो । ‘पेलिकन क्रसिङ’ भनिने यसप्रकारको ट्राफिक लाइट सोमबारदेखि सञ्चालनमा ल्याइएको छ ।

काठमाडौं उपत्यका ट्राफिक प्रहरी कार्यालयका प्रमुख एवं प्रहरी नायब महानिरीक्षक पोषराज पोखरेलले बटन थिचेपछि पाँच सेकेन्डमा हरियो बत्ती बल्ने र तोकिएको ३० सेकेन्डभित्र पैदलयात्रीले जेब्रा क्रसिङ गरिसक्नुपर्ने बताए । प्रयोग गर्न नजानेको अवस्थामा दुर्घटना बढ्ने र प्रयोग गर्न जान्दा राम्रो हुने उनले उल्लेख गरे ।

“काठमाडौं महानगरपालिकाद्वारा आमनागरिकका लागि राखिएको ट्राफिक लाइट हो । यसलाई थिचिसकेपछि यसले सहज रूपमा जुन तोकिएको समय छ, अहिले ३० सेकेन्ड राखिएको छ । त्यो थिचेपछि पाँच सेकेन्ड कुर्नुपर्छ । त्यो कुरेपछि हरियो बत्ती बल्छ, पैदलयात्रीका लागि,” उनले भने, “३० देखि ३५ सेकेन्ड तोकिएको समयमा क्रस गरिसक्नुपर्छ । यो उपयुक्त छ र यसलाई प्रयोग गर्न नजानेको अवस्थामा दुर्घटना बढ्छ । प्रयोग गर्न जान्दा त्यसले सूचना देखाउँछ । त्यसलाई ख्याल गरेर बाटो काट्नुपर्छ ।”

वाग्मती प्रदेशका सांसद दीपेन्द्र श्रेष्ठले अल्पकालीन रूपमा यो प्रविधि लाभदायक हुने विश्वास व्यक्त गरे । “ट्राफिक लाइट, अहिले अल्पकालीन रूपमा जेब्रा ट्राफिक लाइटले राम्रै हुने विश्वास लिएको छु । दीर्घकालीन रूपले यो हाइवेमा अर्थपूर्ण रहँदैन,” उनले भने, “आगामी वर्षमा यसलाई अन्डर पास वे बाटोको जुन रूपमा जेब्रा क्रसिङ राख्न सकिन्छ ।”