काठमाडौं । राष्ट्रिय युवा संघका कार्यकर्ता र दुर्गा प्रसाईंका समर्थकबीच झडप हुनबाट जोगिएको छ ।

प्रहरीका अनुसार आज प्रसाईंको भक्तपुरस्थित घरमा उनका समर्थकहरू जम्मा थिए । उनीहरूको संख्या करिब ८० देखि ९० जना थियो ।

त्यसक्रममा युवा संघका ४०–५० जना कार्यकर्ताहरू झन्डा बोकेर बाइक र्‍यालीसहित प्रसाईंको घर पुगेका थिए । उनीहरू प्रसाईंको घर घेराउ गर्ने योजनासहित आएको ड्युटीमा खटिएका प्रहरी अधिकारी बताउँछन् ।

तर, सम्भावित सुरक्षा चुनौतीलाई लक्षित गरेर प्रसाईंको घर आसपास अगाडिदेखि नै प्रहरी टोली परिचालन गरिएको थियो । युवा संघका कार्यकर्ताले प्रहरीलाई देखेपछि मात्र बाइक नरोकेको प्रहरी स्रोत बताउँछ । अन्यथा मुठभेडको अवस्था निश्चितजस्तै भएको ती प्रहरी अधिकारीले बताए ।

दुवै समूहले गर्न लागेको भोलिको आन्दोलनलाई लक्षित गरेर रातिदेखि नै सुरक्षा व्यवस्था कडा पारिएको छ ।

उपत्यका प्रहरी कार्यालयका अनुसार करिब पाँचहजार प्रहरी, दुईहजार सशस्त्र प्रहरी र त्यति नै संख्यामा गुप्तचर विभागका कर्मचारी आजदेखि नै परिचालन गरिएको छ ।

प्रहरी प्रधान कार्यालय नक्सालमा एसपी दर्जा मुनीका प्रहरी अधिकारीलाई आवश्यक परे फिल्डमा जान तयारी अवस्थामा रहन निर्देशन दिइएको छ ।