काठमाडौं । ब्राजिलको माराकाना रंगशाला विश्वकप छनोटको एउटा खेलका निम्ति सधैँझै तयार थियो । चिरप्रतिद्वन्द्वी अर्जेन्टिनाविरुद्ध खेल भएकाले मैदानमा घरेलु टिमका समर्थकको उपस्थिति बाक्लो थियो ।

तर, बुधबार बिहान (नेपाली समय)का निम्ति तय गरिएको खेल समयमा सुरु हुन सकेन । कारण विशेष थियो । आफ्ना समर्थकलाई प्रहरीले कुटेको भन्दै अर्जेन्टिनी कप्तान लियोनल मेसीले खेल्न अस्वीकर गरेर मैदान छाडेका थिए ।

कप्तानको निर्णयप्रति अर्जेन्टिनी टिमले नै ऐक्यबद्धता जनायो । सोही कारण निर्धारित समयको २७ मिनेट बित्दा पनि खेल सुरु हुन सकेको थिएन । पछि स्थिति शान्त बनेको आभासपछि पाहुना टिम पुनः मैदानमा फर्किएको थियो ।

तनावपूर्ण बनेको खेलमा अर्जेन्टिनाले घरेलु टिमविरुद्ध १–० को कठिन जित दर्ता गर्‍यो । तर, पाहुना टिमले खेललगत्तै मैदानमा आफ्ना समर्थकसँग खुसियाली बाँड्न सकेन । अर्जेन्टिनाले खेल सकिएको केही बेरपछि पुनः मैदानमा फर्किएर आफ्ना समर्थकसँग खुसियाली मनाएको थियो ।

“त्यहाँ खेलाडीका परिवार पनि थिए । हामी खेल खेल्नुभन्दा पनि उनीहरूको अवस्थाप्रति धेरै चिन्तित थियौँ,” मैदानबाट फर्किनुको कारण प्रस्ट्याउँदै अर्जेन्टिनी कप्तानले भने, “हामी लकर रुममा गयौँ, किनकि त्यस बेला हामी अवस्था शान्त बनाउन चाहन्थ्यौँ । यसभन्दा पर हामी अरू केही गर्न सक्दैनौँ । प्रहरीले समर्थकलाई पिटिरहेको हामीले देखेका थियौँ ।”

दुवै टिमका खेलाडीले खेलअघि समर्थकलाई शान्त रहन आग्रह गरेका थिए । अर्जेन्टिनी गोलकिपर दिबु मार्टिनेजले त पाहुना टिमका समर्थकनजिक पुगेर हिंसा रोक्न प्रहरीसँग चर्काचर्की नै गरे ।

राष्ट्रियगानसँगै सुरु भएको समर्थकबीचको झडप रोक्न प्रहरीले लाठीचार्ज गरेको थियो । बस्ने कुर्सीका केही भाग र अरू वस्तुले दुवै टिमका समर्थक एकार्कामाथि प्रहार गरिरहेका थिए । झडपमा एक समर्थकको टाउकामा चोट लागेपछि रगताम्मे अवस्थामा उनलाई मैदानबाट बाहिर लगिएको थियो ।

अर्जेन्टिनी टिम ‘लकर रुम’बाट २२ मिनेपछि मैदानमा फर्किएको थियो । त्यसपछि पाहुना टिमले खेल सुरु हुनुअघि ‘वार्म अप’ गरेको थियो ।

खेलका दौरान अर्जेन्टिनी समर्थकले आफ्नो टिमका पक्षमा नारा लगाउँदा दर्जनौँ प्रहरीले उनीहरूलाई घेरेर राखेका थिए ।

माराकाना रंगशालामा खटिएका उच्च पदका प्रहरी अधिकारी वग्नर फेरेइराले आयोजकलाई घटनाको जिम्मेवार ठहर्‍याए । उनले प्रहरीको कार्यको बचाउ गरे । आयोजकले घरेलु र पाहुना टिमलाई फरक ठाउँमा राख्न नसकेको आरोप उनले लगाए ।

“प्रत्येक कार्यलाई प्रतिकार्य आवश्यक हुन्छ । यहाँ यसअघि पनि टकरावको स्थिति बनेको इतिहास छ । सुरुमा हामीले उनीहरूसँग कुरा गर्‍यौँ, त्यसपछि मात्र हामी आफ्नो लाठी प्रयोग गर्न बाध्य बन्यौँ । हामीले त्यहाँ कुनै घातक बल प्रयोग गरेका थिएनौँ । रबरको गोली र अश्रुग्यासको प्रयोग गरिएको थिएन । यो निकै प्राविधिक प्रयोग थियो,” फेरेइराले खेलपछि भने ।

खेलका निम्ति माराकानाको ६९ हजार टिकट बिक्री गरिएको थियो । ब्राजिलका समर्थक खेलअघि मेसीको तारिफमा देखिएका थिए । तर, मैदान छाडेर अर्जेन्टिना पुनः फर्किएपछि उनीहरूले मेसीविरुद्ध नाराबाजी गर्न सुरु गरे ।

अर्जेन्टिनी टिम मैदान छाडेर निस्कँदा ब्राजिलका खेलाडी भने मैदानमै वार्म अप गर्दै थिए । उनीहरू पाहुना टिमलाई फर्किरहेका थिए ।

जितसँगै फिफा विश्वकपको दक्षिण अमेरिकी छनोटमा अर्जेन्टिना शीर्ष स्थानमा छ । अर्जेन्टिनाले ६ खेलबाट १५ अंक जोडेको छ । ब्राजिल सात अंकसहित तालिकाको छैटौँ स्थानमा छ । दुवै टिमले अघिल्लो खेलमा हार व्यहोरेका थिए । दक्षिण अमेरिकी छनोटमा कुल १० टिम छन् ।

कसरी सुरु भयो प्रतिद्वन्द्विता ?
क्रिकेटमा भारत–पाकिस्तानजस्तै फुटबलमा ब्राजिल र अर्जेन्टिनाबीच गहिरो प्रतिद्वन्द्विता छ । ब्राजिल र अर्जेन्टिनाबीचको प्रतिद्वन्द्विता क्लबस्तरबाट सुरु भएको थियो । सन् १९७८ मा अर्जेन्टिनाले विश्वकप जितेपछि यो प्रतिद्वन्द्विता झनै बढ्दै गयो ।

सन् १९८२ को विश्वकपको दोस्रो चरणमा ब्राजिलले अर्जेन्टिनालाई ३–१ ले पराजित गरेको थियो । त्यसको आठ वर्षपछि अर्जेन्टिनाले विश्वकपको अन्तिम–१६ मा ब्राजिललाई १–० ले हराउँदै उक्त हारको बदला लिएको थियो ।

त्यसयता यी दुई प्रतिद्वन्द्वीले विश्वकप छनोट, मैत्रीपूर्ण खेल र कोपा अमेरिकामा प्रतिस्पर्धा गरे पनि विश्वकपमा एकार्काविरुद्ध खेलेका छैनन् ।

गत वर्ष कतारमा भएको विश्वकपमा यी दुई टिमबीच सेमिफाइनलमा प्रतिस्पर्धा हुने सम्भावना थियो । तर, ब्राजिल क्वार्टरफाइनलमा क्रोएसियासँग हारेपछि त्यो सम्भावना सकिएको थियो । सेमिफाइनलमा ब्राजिल प्रतिद्वन्द्वी नपाएको अर्जेन्टिनाले कतार विश्वकपको उपाधि नै जितेको थियो ।

यी दुई राष्ट्रबीच फुटबलका सर्वकालीन महान् खेलाडीका विषयमा पनि विवाद भइरहन्छ । त्यस्तो विवादमा ब्राजिलियन पेलेलाई र अर्जेन्टिनी मेसी र म्याराडोनालाई सर्वकालीन महान् खेलाडीको शीर्ष सूचीमा राख्छन् । यसले पनि यी दुईको प्रतिद्वन्द्विता बढाउन मलजल गरेको छ ।

यही नोभेम्बर ४ मा ब्राजिलको फ्लुमिनेन्सले आफ्ना केही र अर्जेन्टिनी क्लब बोका जुनियर्सका समर्थकबीच सडकमै भएको झगडाको एक सातापछि माराकाना रंगशालामा कोपा लिबर्टाडोरेसको उपाधि जितेको थियो ।

तस्बिरहरू : एपी ।