काठमाडौं । नेपाली राष्ट्रिय फुटबल टिमका मुख्य प्रशिक्षक भिन्चेन्सो अल्बर्टो एनेसले यमनविरुद्ध नेपालको विगत नकारात्मक रहे पनि यसपटक जित्नलाई खेल्ने बताएका छन् ।

नेपालले मंगलबार फिफा विश्वकप–२०२६ छनोटको दोस्रो चरणमा यमनलाई घरेलु मैदानमा आतिथ्यता प्रदान गर्दै छ । त्रिपुरेश्वरस्थित दशरथ रंगशालामा हुने खेल साँझ ७ बजेदेखि सुरु हुनेछ ।

खेलको पूर्वसन्ध्यामा आयोजित पत्रकार सम्मेलनमा प्रशिक्षक अल्बर्टो एनेसले यमनविरुद्ध नेपालले उच्चस्तरको प्रदर्शन गर्ने बताए ।

“हाम्रो तयारी राम्रो छ । यमनसँग नेपालको यसअघिका खेलको नतिजा राम्रो छैन । सन् २०१७ मा गोलरहित बराबरी खेल्नुबाहेक नेपालले सबै खेलमा हार बेहोरेको छ । यसपटक हामी जित्न चाहन्छौँ । हामी उच्चस्तरको प्रदर्शन गर्न चाहन्छौँ । किनकि हामी निकै बलियो टिमसँग खेल्न जाँदैछौँ । जोसँग निकै अनुभवी प्रशिक्षकको साथ छ,” उनले भने ।

उनले नेपाली टिमको भावनात्मक सम्बन्ध बलियो बनेको समेत बताए । “यसपटक टिममा एक प्लस प्वाइन्ट छ । म नेपाली टिमको प्रशिक्षक बनेर आउँदा यो एक टिममात्र थियो । तर, अहिले टिमको भावनात्मक सम्बन्ध बलियो बनेको छ । एकसाथ टिमको रूपमा खेल्न पाउँदा सबै खुसी छौँ । भोलिको खेलका लागि हामी तयार छौँ,” प्रशिक्षक अल्बर्टो एनेसले थपे ।

छनोटको दोस्रो चरणमा नेपाल समूह ‘एच’ मा छ । यस समूहमा नेपालसँगै यमन, युनाइटेड अरब इमिरेट्स (यूएई) र बहराइन छन् । यसअघि पहिलो खेलमा नेपाल यूएईसँग उसैको मैदानमा ४–० ले पराजित भएको थियो ।

नेपाली टिमका कप्तान किरण चेम्जोङ यूएईसँगको हार विगत भएको भन्दै जितका लागि शतप्रतिशत दिने बताए ।

“सबै कुरा कोचले भनिसक्नुभयो । छनोटको पहिलो खेल अब विगत भइसक्यो । त्यो खेललाई हामीले सम्झिएर हुने पनि केही होइन । घरेलु मैदानमा हुने भोलिको खेलका लागि ममात्र होइन टिमका सबैजना उत्साहित छौँ,” कप्तान किरणले भने, “टिम आत्मविश्वासी छ । मैले पहिलेदेखि नै भन्दै आएको छु, दशरथ रंगशाला मेरा लागि विश्वकै उत्कृष्ट रंगशाला हो । यमनविरुद्ध जित्नका लागि पनि आफ्नो ठाउँबाट शतप्रतिशत प्रयास रहने छ । भोलिको खेल जितेर छनोटको दोस्रो चरणको यात्रामा नेपालको आसलाई कायम राख्न चाहन्छौँ ।”