काठमाडौं । मेडिकल व्यवसायी दुर्गा प्रसाईंले ७ मंसिरदेखि काठमाडौंबाट राष्ट्र, राष्ट्रियता धर्म, संस्कृति नागरिक बचाउ महाअभियान घोषणा गर्ने बताउँदै आएका छन् । एक महिनादेखि नै त्यसको तयारीमा लागेका प्रसाईंले तयारी अन्तिम चरणमा पुगेको बताएका छन् ।

आइतबार महाअभियान नेपालको तर्फबाट विज्ञप्ति जारी गर्दै उनले ७ मंसिरको दिन आफ्नो महाअभियानमा अन्य समूहबाट हुनसक्ने सम्भावित मानवअधिकार उल्लंघनका गतिविधि प्रत्यक्ष निगरानी गरिदिन अनुरोध गरेका छन् ।

महाअभियानअन्तर्गत ललितपुर, भक्तपुर र काठमाडौंका विभिन्न ठाउँबाट र्‍याली सुरु गरेर माइतीघर मण्डलामा कोणसभा गर्ने प्रसाईंको तयारी छ । तर, ७ मंसिरमै नेकपा (एमाले)निकट युवासंघले समेत माइतीघरमै कार्यक्रम घोषणा गरेपछि युवा संघ र प्रसाईं दुवैको कार्यक्रम रोक्ने जिल्ला प्रशासन कार्यालय काठमाडौंको तयारी छ ।

युवा संघको आन्दोलन एमाले नेता महेश बस्नेतको नेतृत्वमा हुँदै छ । पछिल्लो समय नेता बस्नेत र प्रसाईं सार्वजनिक रुपमै आरोप पत्यारोपमा उत्रिएका छन् । केही समयअघि मात्रै प्रसाईंलाई युवा संघका कार्यकर्ताले मोसो दल्ने प्रयास समेत गरेका थिए । त्यसयता प्रसाईं र बस्नेतबीच झन् तिक्तता बढेको छ ।

चारवटै सुरक्षा निकाय परिचालन

७ मंसिरको कार्यक्रममा दुवै पक्षबीच मुडभेडको अवस्था आउन सक्ने सूचना सुरक्षा संयन्त्रसँग छ । अझ प्रसाईं र बस्नेतले एउटै ठाउँ माइतीघर मण्डलामा प्रदर्शन गर्ने समय तालिका सार्वजनिक गरेपछि मुठभेडको जोखिम बढेको हो ।

यद्यपि, जिल्ला प्रशासन कार्यालय काठमाडौंले दुवै समूहलाई माइतीघर मण्डला प्रवेशमा रोक लगाउने गरी निषेधाज्ञा लगाउने तयारी गरेको छ । त्यसको लागि सोमबार सुरक्षा संयन्त्रसहित जिल्ला सुरक्षा समितिको बैठक बस्ने तयारी छ ।

उपत्यका प्रहरी कार्यालय रानीपोखरीका प्रमुख एआईजी दीपक थापाले पनि सकेसम्म दुवै समूहलाई वैकल्पिक ठाउँमा कार्यक्रम गराउने भन्नेबारे छलफल भइरहेको बताए । उनका अनुसार मण्डलाबाहेक तीनकुने, चावहिल, माछापोखरी, मूलपानी क्रिकेट मैदान र नक्साल नारायणचौरमध्ये एकठाउँमा गर्न प्रसाईं समूहलाई प्रहरीले सुझाव दिएको छ ।

“दुवै समूहबीच सम्भावित मुठभेड नहोस् भन्ने उद्देश्यले हामी सुरक्षा योजना बनाउँदै छौँ । सकेसम्म दुवै समूहले छुट्टछुट्टै ठाउँमा कार्यक्रम गर्दा त्यो अवस्था आउँदैन भन्ने हाम्रो आकलन हो । यद्यपि, प्रहरीसहित अन्य सुरक्षा निकायसँग पनि छलफल हुँदै छ,” एआईजी थापाले भने ।

७ गतेको कार्यक्रममा प्रसाईं समूहले अहिलेको व्यवस्थाप्रति नै घृणा फैलाउने खालको गतिविधि गर्न सक्ने गृहको विश्लेषण छ । आन्दोलन हिंसात्मक नहोस् भन्ने उद्देश्यले जिल्ला सुरक्षा समितिमार्फत उपत्यका प्रहरी कार्यालय रानीपोखरीका प्रहरी नायब महानिरीक्षक (डीआईजी)को नेतृत्वमा नेपाली सेनाका कर्णेल, सशस्त्र प्रहरी बलका एसएसपी र राष्ट्रिय अनुसन्धान विभाग अधिकारीसहितको छुट्टै सुरक्षा टोली बन्ने भएको हो ।

त्यसको अन्तिम गृहकार्य भइरहेको एआईजी थापाले जानकारी दिए । राष्ट्र बचाउ अभियानका केन्द्रीय सदस्य अनन्त प्याकुरेलले आन्दोलनमा करिब १० लाख मानिस सडकमा उत्रिने बताए । उनले भने, “हामीले आन्दोलन सुरु गर्ने भनेकै दिन युवा संघले पनि कार्यक्रम गर्ने भन्ने कुरा सुनेका छौँ । उनीहरुले माइतीघर मण्डलामा कार्यक्रम गर्ने भनेर जिल्ला प्रशासनलाई जानकारी गराएका रहेछन् । हामीले आज रत्नपार्कमा गर्न अनुमति मागेका छौँ ।”

प्रशासनले ३ बजेपछि आफूहरुलाई जानकारी दिने प्याकुरेलले बताए । आफ्नो आन्दोलनको मुख्य लक्ष्य नै अहिलेको व्यवस्था परिवर्तनको लागि भएको प्याकुरेलले स्पष्ट पारे । प्रहरी स्रोतले पनि प्रसाईंको कार्यक्रममा राजावादी शक्तिको घुसपैठ हुनसक्ने आशंका गरेको छ ।

युवा संघका अध्यक्ष क्षितिज थेबेले आफूहरुको आन्दोलन सरकारको अकर्मण्यता, मूल्यवृद्धि, व्यवस्था विरोधीहरुका विरुद्ध रहेको बताउँदै आएका छन् ।

नोट : शीर्षकलाई सच्याइएको छ ।