काठमाडौं । राष्ट्रिय मानवअधिकार आयोगले बालअधिकार हननमा संलग्नलाई कारबाही गर्न आग्रह गरेको छ । अन्तर्राष्ट्रिय बालअधिकार दिवसका अवसरमा सोमबार विज्ञप्ति जारी गर्दै आयोगले यस्तो आग्रह गरेको हो ।

“बालअधिकारको हननमा संलग्नहरूलाई कानुनबमोजिम कारबाही गर्न, बालबालिकाको गाँस, बास, कपासलगायत शिक्षा, स्वास्थ्यजस्ता आधारभूत अधिकारको सुनिश्चितता गरी बालअधिकारको रक्षा गर्न र बाल सुधारगृहको व्यवस्थित रूपमा सञ्चालनका लागि आवश्यक कार्य गर्न आयोग तीनै तहका सरकारलाई आग्रह गर्दछ,” विज्ञप्तिमा उल्लेख छ ।

नेपालको संविधान, कानुन र महासन्धिमा भएका प्रावधानको पालना गर्न÷गराउन आयोगले तीनै तहका सरकारलाई भनेको छ ।

“बालअधिकारको संरक्षण र वकालतमा परिणाममुखी ढंगले कार्य गर्न समेत आयोग सम्पूर्ण नागरिक, अभिभावक, राजनीतिक दल, अधिकारकर्मी र सर्वसाधारणलाई अनुरोध गर्दछ,” विज्ञप्तिमा भनिएको छ ।

यो वर्षको अन्तर्राष्ट्रिय बालअधिकार दिवसको नारा ‘फर एभ्री चाइल्ड, एभ्री राइट’ रहेको छ । “आज नेपाललगायत विश्वमा बालअधिकारको लागि प्रशस्तै कानुन निर्माण र महासन्धिहरू जारी भए पनि महासन्धि र कानुनले परिकल्पना गरेझैँ बालअधिकारको पूर्ण प्रत्याभूति हुन सकेको छैन,” आयोगले औँल्याएको छ ।

आयोगले स्पष्ट शब्दमा भनेको छ, “बालअधिकारको हनन र बालयौन दुराचारमा संलग्नहरूलाई कानुनबमोजिम कारबाही हुन सकेको छैन ।”