काठमाडौं । आईसीसी एकदिवसीय विश्वकपको फाइनलमा भारतविरुद्ध अस्ट्रेलियाका एडम जाम्पाले आठौँ सफलता दिलाएका छन् ।

भारतको अहमदाबादस्थित नरेन्द्र मोदी क्रिकेट रंगशालामा जारी खेलमा टस हारेर ब्याटिङमा आएको भारतले जसप्रित बुमराहलाई आठौँ विकेटको रूपमा गुमाएको हो । बुमराहले भारतीय टिमको स्कोर बोर्डमा एक रन थपे ।

जारी खेलको ४५ ओभर समाप्त हुँदा भारतले आठ विकेट गुमाएर २१५ रन बनाएको छ । यसअघि भारतीय टिमको खातामा कप्तान रोहित शर्माले ४७, विराट कोहलीले ५४ रन थप्दा श्रेयस ऐयर र सुभमन गिलले समान चार रन जोडेका थिए । रविन्द्र जडेजा नौ र केएल राहुल ६६ रनमा आउट भए । मोहम्मद सामीले ६ रन बनाए ।

दुवै टिम प्रतियोगिताको १३औँ संस्करणमा आफूलाई विजेता बनाउने लक्ष्यसहित मैदानमा उत्रिएका छन् । हालसम्म भारतले दुई र अस्ट्रेलियाले पाँचपटक विश्वकपको उपाधि जितेका छन् ।

विश्वकपको फाइनलमा स्थान बनाउने क्रममा भारतले न्युजिल्यान्डलाई ७० रनले र अस्ट्रेलियाले दक्षिण अफ्रिकालाई तीन विकेटले हराएको थियो ।

प्रतियोगितामा भारत एक मात्र अपराजित टिम हो । भारतले समूह चरणको खेलमा अस्ट्रेलियाविरुद्ध ६ विकेटको जित निकालेको थियो ।