काठमाडौं । सरकारले सोमबार निकै रुचाइएको भिडियो सेयरिङ एप टिकटक प्रयोगमा प्रतिबन्ध लगाउने निर्णय गर्‍यो । मन्त्रिपरिषद्को बैठकले निर्णय गरेलगत्तै सञ्चार तथा सूचनाप्रविधि मन्त्रालयले नेपाल दूरसञ्चार प्राधिकरणलाई पत्र लेखेर सरकारको निर्णय कार्यान्वयन गर्न निर्देशन दियो । प्राधिकरणले इन्टरनेट सेवा प्रदायकलाई पत्राचार गरेर टिकटक बन्द गर्न भन्यो ।

प्राधिकरणका अध्यक्ष पुरुषोत्तम खनालले बाह्रखरीसँगको संवादमा टिकटक आजै बन्द हुने बताएका छन् । "हामीले सेवा प्रदायक कम्पनीहरूलाई खबर गरिसकेका छौँ । एनसेल र एनटीसीलाई पनि भनिसकेका छौँ । उहाँहरूले काम गर्दै हुनुहुन्छ । एक–डेढ घण्टाभित्र काम भइसक्छ होला । आजै बन्द हुन्छ," उनले भनेका छन् ।

अर्थात् नेपालमा अब टिकटक बन्द हुने निश्चित छ । 

कार्तिक २१ गते बसेको सर्वदलीय बैठकले सामाजिक सञ्जाल 'अराजक' बनेको निष्कर्ष निकालेको थियो । त्यही बैठकमा शीर्ष राजनीतिक दलहरूका नेताहरूले सामाजिक सञ्जालमा अश्लीलता, उच्छृङ्खलतामा वृद्धि भएको बताएका थिए ।

त्यसको हप्तापछि सरकारले टिकटकमा प्रतिबन्ध लगाउने निर्णय गरेको हो । यद्यपि सरकारको निर्णयको सत्तारूढ दलकै शीर्ष नेताहरूले आलोचना गरिरहेका छन् । 

नेपाली कांग्रेसमा एउटा समूहकै नेतृत्व गरिरहेका नेता शेखर कोइरालाले टिकटक प्रयोगमा रोक लगाउने सरकारको निर्णय खेदजनक रहेको प्रतिक्रिया दिएका छन् । उनले तत्काल निर्णय फिर्ता लिन भनेका छन् ।

"व्यक्तिगत स्वतन्त्रता कुण्ठित गर्ने गरी टिकटक बन्द गर्ने निर्णय सरकारबाट हुनु खेदजनक छ । यो निर्णय तत्काल फिर्ता लिई लोकतान्त्रिक बन्न सरकारलाई आग्रह गर्दछु," कोइरालाले ट्विटरमा भनेका छन् ।

कांग्रेसकै महामन्त्रीद्वय गगन थापा र विश्वप्रकाश शर्माले पनि सरकारको निर्णयको आलोचना गरेका छन् । 

महामन्त्री थापाले त सरकार उल्टो बाटो हिँडेको टिप्पणी गरेका छन् । सामाजिक सञ्जालको दुरुपयोग गर्नेलाई निरुत्साहित गर्न नियमन आवश्यक भएको तर नियमनको नाममा बन्द नै गर्नु सरासर गलत भएको तर्क थापाको छ । 

“यो एउटा सामाजिक सञ्जाल बन्द गर्ने, नगर्नेभन्दा पनि यो सरकारको नियतको विषय हो,” उनले सामाजिक सञ्जालमा लेखेका छन्, “यसमा सरकारको नियत ‘अभिव्यक्ति तथा वैयक्तित स्वतन्त्रता’लाई कुण्ठित गर्ने देखियो । सरकारले यो कदम सच्चाउनु पर्छ, यसमा किन्तु परन्तु केही पनि चल्दैन ।”