काठमाडौं । नेपाल क्रिकेट संघ (क्यान)ले दर्शकहरूलाई नेपाल र युनाइटेड अरब इमिरेट्स (यूएई) बीचको खेल घरमै बसेर हेर्न अनुरोध गरेको छ ।

आईसीसी ट्वान्टी–२० विश्वकप एसिया छनोटको फाइनल प्रवेशका लागि भोलि (शुक्रबार) हुने खेल घरमै बसेर हेर्न अनुरोध गरेको हो ।

नेपाल र यूएई शुक्रबार मूलपानी क्रिकेट मैदानमा प्रतियोगिताको फाइनल प्रवेशका लागि भिड्दै छन् ।

प्रतियोगिताको फाइनल पुग्ने टिमले आगामी वर्ष उत्तर अमेरिकामा हुने ट्वान्टी–२० विश्वकपमा स्थान बनाउने हुँदा मूलपानीमा दर्शकको बाक्लो उपस्थिति रहने अनुमान छ ।

मूलपानीमा दर्शकको चापलाई धान्न सक्ने स्थान नभएका कारण क्यानले सकेसम्म घरमै बसेर खेल हेर्न अनुरोध गरेको हो ।

क्यानले यो खेलका लागि तीन हजार ५०० टिकट मात्र अनलाइन उपलब्ध रहेको जनाएको छ ।

यस्तै, सेमिफाइनलमा लागि कुनै पनि पास वितरण नगरिएको समेत क्यानले जनाएको छ । मूलपानीमा शुक्रबार नेपाल र यूएईबीचको खेल बिहान ११ बजेदेखि सुरु हुनेछ ।

नेपालले समूह ‘ए’ को उपविजेताको रूपमा सेमिफाइनल यात्रा तय गर्दा यूएई समूह ‘बी’ को विजेता हो ।