काठमाडौं । राष्ट्रियसभाको विधायन व्यवस्थापन समितिले राष्ट्रिय मर्यादासम्बन्धी विधेयक २०७९ लाई पास गरेको छ । समितिको सोमबार बसेको बैठकले विधेयकलाई समितिबाट पास गर्दै मंगलबार बस्ने राष्ट्रियसभा बैठकमा प्रस्तुत गर्ने निर्णय गरेको छ ।

समितिबाट पास भएको विधेयकले प्रतिनिधिसभा विपक्षी दलको नेतालाई सातौँ वरीयतामा राख्ने प्रस्ताव गरेको छ । अहिलेको वरीयतामा भने आठौँ नम्बरमा विपक्षी दलका नेता रहेका छन् ।

विधेयकमा सातौँ वरीयतामा संविधानसभाका अध्यक्ष, प्रतिनिधिसभाका पूर्वसभामुख, व्यवस्थापिका संसद्का पूर्वसभामुख, राष्ट्रियसभाका पूर्वअध्यक्षसमेत रहने प्रस्ताव गरिएको छ ।

“प्रायः प्रतिनिधिसभामा संसदीय दलको नेता सबै पूर्वप्रधानमन्त्रीहरू छन् । त्यसैले विपक्षी दलका नेतालाई सातौँ नम्बरमा राख्नुपर्छ,” बैठकमा कांग्रेस सांसद रमेशजंग रायमाझीले भने ।

समिति बैठकले प्रदेशका मुख्यमन्त्री र संघीयमन्त्रीको समान हैसियतमा राख्ने प्रस्तावसहित विधेयक पास गरेको छ । आजको बैठकमा संघका मन्त्री र मुख्यमन्त्री नवौँ वरीयतामा रहने सहमतिमा सांसदहरू पुगेका हुन् । अहिले प्रचलनमा भने सम्बन्धित प्रदेशभित्र मात्र मुख्यमन्त्री र संघका मन्त्रीको आठौँ वरीयतामा समान हैसियत हुने उल्लेख थियो ।

यसको अर्थ सम्बन्धित प्रदेशका मुख्यमन्त्रीको प्रदेश बाहिर भने संघको मन्त्री बराबर हैसियत हुने थिएन । सोमबारको बैठकले मुख्यमन्त्रीको पछाडि झुण्डाइएको सम्बन्धित प्रदेश भन्ने शब्द पनि हटाएर विधेयक समितिबाट पास गरेको छ । सोही वरीयतामा विपक्षी दलको उपनेतालाई पनि राख्ने प्रस्तावसहित समितिबाट विधेयक पास भएको छ ।

विधेयक दर्ता गर्दा भने सम्बन्धित प्रदेशको मुख्यमन्त्रीलाई आफ्नो प्रदेशभित्र संघको मन्त्रीभन्दा मागि राखिएको थियो । तर, पछाडि जोडिएका प्रदेश भित्र र बाहिर हटाउने निर्णय गर्दै मर्यादाक्रम नयाँ प्रस्तावसहित विधेयक समितिबाट पास भएको हो । समितिबाट पास भएको विधेयकअनुसार संघको मन्त्री र प्रदेशका मुख्यमन्त्री नवौँ वरीयतामा पुगेका छन् ।