काठमाडौं । नेपाली राष्ट्रिय क्रिकेट टिमका कप्तान रोहितकुमार पौडेलले घरेलु मैदानमा हुने ट्वान्टी–२० विश्वकप छनोट नेपालका लागि ठूलो अवसर भएको बताएका छन् ।

आगामी वर्ष वेस्ट इन्डिज र अमेरिकाका हुने ट्वान्टी–२० विश्वकपको एसिया क्षेत्रीय छनोट सोमबारदेखि नेपालमा सुरु हुँदै छ । प्रतियोगिताको पूर्वसन्ध्यामा आयोजित पत्रकार सम्मेलनमा कप्तान रोहितले घरेलु वातावरण भएकाले विश्वकपमा छनोट हुन टिम उत्साहित रहेको प्रतिक्रिया दिए । 

“पछिल्लो ६–७ महिनायता ब्याटिङमा हामी राम्रो गरिरहेका छौँ । तर, त्रिदेशीय शृंखलाको फाइनलमा आशअनुरुपको प्रदर्शन हुन सकेन । फाइनलको अन्तिम १० ओभरमा ब्याटिङ कोल्याप्सजस्तै हुन पुग्यो,” रोहितले भने, “तर, हिजो के भयो भन्ने कुरा बिर्सिसकेका छौँ । अबको ध्यान आउने प्रतियोगितामा छ । खेलका लागि हामी सबै उत्साहित छौँ । विशेषगरी घरेलु मैदानमा खेल्ने भएकाले हाम्रो लागि यो ठूलो अवसर हो । यसलाई सम्मान गरेर खेल्नेछौँ ।”

रोहितले नेपाली टिममा सन्दीप लामिछाने फर्किदा टोली अझ बलियो हुने बताए । 

“स्यान्डी दाइ (सन्दीप लामिछाने) आएपछि टिम ब्यालेन्स हुन्छ । अनुभवी बलर हुन् । त्यसले गर्दा टिम अझै बलियो हुन्छ । विश्वकप खेल्ने सम्भावना उच्च छ । तर, ट्वान्टी–२० खेल हो । कुन टिमले कस्तो प्रदर्शन गर्छ भन्न सकिन्न । हरेक खेल जित्छौँ भन्नेमा केन्द्रित छौँ,” रोहितले थपे ।

नेपाली टिमका मुख्य प्रशिक्षक मोन्टी देसाईले पनि नेपालका लागि विश्वकपमा छनोट हुने यो स्वर्णिम अवसर भएको बताए ।

“हामीले सन्दीपलाई आवश्यक रहेको ब्रेक दियौं । अहिले उनी फ्रेस छन् र प्रतियोगिताका लागि तयार छन्,” देसाईले भने, “यो हाम्रो लागि विश्वकप छनोट हुने स्वर्णिम अवसर हो । र, हामीले यो अवसरलाई सम्मान गर्नुपर्छ । पक्कै पनि हामीले पछिल्लो वर्षयता राम्रो क्रिकेट खेल्दै आएका छौँ ।”

सोमबारदेखि सुरु हुने विश्वकप छनोटमा नेपालसहित कुल आठ टिम सहभागी छन् । जसलाई एक समूहमा चार टिम रहनेगरी दुई समूहमा विभाजन गरिएको छ । 

नेपाल समूह ‘ए’ मा छ । यो समूहमा नेपालसँगै सिंगापुर, मलेसिया र ओमान छन् । छनोटको पहिलो खेलमा नेपालले कात्तिक १३ गते सिंगापुरसँग टीयू मैदानमा खेल्नेछ । नेपालले कात्तिक १४ गते मलेसिया र कात्तिक १६ गते ओमानसँग खेल्नेछ ।

यस्तै, समूह ‘बी’ मा युनाइटेड अरब इमिरेट्स (यूएई), बहराइन, हङकङ र कुवेत छन् । प्रत्येक समूहबाट शीर्ष दुई टिम सेमिफाइनल प्रवेश गर्नेछन् । यस छनोटबाट फाइनल पुग्ने दुई टिम आगामी वर्ष उत्तर अमेरिकामा हुने विश्वकपमा छनोट हुनेछन् ।