काठमाडौं । राष्ट्रिय ध्वाजवाहक नेपाल वायुसेवा निगम (नेपाल एयरलाइन्स)ले विमान खरिदका निम्ति टेन्डर (बोलपत्र) आह्वान गरेको छ । निगमले तीन ‘स्टल’ विमान खरिदका निम्ति ३५ दिने सूचना निकालेको हो । सूचनाअनुसार आउँदो डिसेम्बर ५ तारिखसम्म आवेदन दिइसक्नुपर्नेछ ।

संस्कृति, पर्यटन तथा नागरिक उड्डयनमन्त्री सुदन किरातीले पद सम्हालेदेखि नै विमान खरिद गरिने बताउँदै छन् । विमान अभावका कारण दुर्गमका यात्रीले समस्या भोगेको उनको भनाइ छ । सोही कारण विमान थप्नुपर्नेमा उनले जोड दिँदै आएका छन् ।

खुद सम्पत्ति करिब आठ अर्ब ऋणात्मक
निगम (नेपाल एयरलाइन्स)को खुद सम्पत्ति करिब आठ अर्ब ऋणात्मक छ । गएको जेठ १४ गते अर्थ मन्त्रालयले सार्वजनिक गरेको ‘सार्वजनिक संस्थानको वार्षिक स्थिति’अनुसार निगमको खुद सम्पत्ति सात अर्ब ८४ करोड १५ लाख ५२ हजार ७६४ रुपैयाँ ऋणात्मक देखिएको थियो ।

पूर्वगर्भनर दीपेन्द्रबहादुर क्षेत्रीको संयोजकत्वमा निगमको संरचनागत एवं व्यवस्थापकीय अध्ययन तथा सिफारिस समितिले बुझाएको प्रतिवेदनमा विभिन्न समयमा विमान खरिद गर्दाको ऋण ४८ अर्ब पुगेको उल्लेख छ ।

मन्त्रालयको तथ्यांकानुसार निगमको दीर्घकालीन ऋण ३६ अर्ब तीन करोड ९२ लाख ३६ हजार ३२४ रुपैयाँ छ । अल्पकालीन ऋण ४८ करोड ५८ हजार ६३ हजार ८२ रुपैयाँ छ । निगमको कुल सञ्चालन आय १६ अर्ब ४२ करोड १६ लाख ७९ हजार २१६ रुपैयाँ छ । कुल सञ्चालन लागत १८ अर्ब ३६ करोड सात लाख २४ हजार २६५ रुपैयाँ छ । 

आर्थिक वर्ष २०७८/७९ मा निगमको खुद नोक्सान एक अर्ब ७० करोड ३० लाख ६८ हजार रुपैयाँ थियो । २०७८/०७९ सम्मको सञ्चित नोक्सान १५ अर्ब ४७ करोड ९० लाख रुपैयाँ रहेको तथ्यांकमा उल्लेख छ ।

नेपाल सरकारलाई बुझाउनुपर्ने निगमको ऋण तीन अर्ब ६० करोड ९८ हजार र ब्याज रकम नौ करोड ५९ लाख रुपैयाँ छ ।

निगमले विभिन्न बैंक तथा वित्तीय संस्थालाई बुझाउनुपर्ने ऋणको साँवा ३३ अर्ब ९३ करोड ७३ लाख र ब्याज तीन अर्ब २५ करोड ३१ लाख रुपैयाँ छ ।

नेपाल सरकारलाई तिर्न बाँकी राजस्व रकम एक करोड ६१ लाख ५७ हजार २५२ रुपैयाँ छ ।

क्षेत्री संयोजकत्वको समितिले निगमको सोल्टी होटेलमा रहेको सेयर बेचेर स्रोतको जोहो गर्न सुझाव दिएको छ । निगमको सोल्टी होटेलमा एक करोड तीन लाख ३३ हजार ६९९ कित्ता सेयर स्वामित्व छ । उक्त सेयर बेचेर विमान खरिद गर्न स्रोतको जोहो गर्न सकिने समितिले सुझाव दिएको हो ।

त्यसपछि मन्त्री किराती हौसिएका हुन् । निगमले पनि आफ्नै आन्तरिक स्रोतबाट विमान खरिद गर्ने जनाएको छ ।