काठमाडौं । धादिङदेखि मानिस दुई किलो चिनी किन्न काठमाडौंको सुपथ मूल्य पसलमा आएका छन् ।

नेपालीको मुख्य चाडका बेला बजारमा चिनी अभाव भएपछि धादिङको छत्रेदेउरालीका साधुरामप्रसाद भट्टराईसहितका स्थानीयवासी कालीमाटीस्थित साल्ट ट्रेडिङ कर्पोरेसनमा आएका हुन् ।

दसैँ, तिहार र छठमा नेपालीले ठूलो मात्रामा चिनी प्रयोग गर्ने बेला सरकारले दायित्व निभाउन नसकेको भट्टराईले बताए । उनले मुख्य चाडपर्वको समयमा दुई किलो चिनी किन्न धादिङदेखि काठमाडौं आउनुपर्ने बाध्यता सरकारको लापरबाहीकै कारण भएको भन्दै आक्रोश व्यक्त गरे ।

भट्टराईले धादिङका खाद्यान्न पसलहरूमा चिनी नपाएको र पाए पनि किलोको १६० रुपैयाँसम्म पर्ने गरेको बताए । जन्मेदेखि पहिलोपटक दुई किलो चिनी किन्न धादिङबाट काठमाडौं आउनुपरेको उनले सुनाए ।

अर्की उपभोक्ता सावित्रा उप्रेतीले साल्ट ट्रेडिङबाट चिनी किन्न दुई घण्टा लाइन लाग्नुपरेको बताइन् । उनले अरू पसलहरूमा चिनी नपाएको भन्दै दुई किलो भए पनि लाइन बसेर लिन आएको सुनाइन् ।

सरकार जनताप्रति उत्तरदायी नहुँदा हरेक वर्ष ग्यास, चिनी, नुनलगायत खाद्यान्नको अभाव झेल्नुपरेको उनको भनाइ छ । जनतालाई सधैँ सास्ती मात्र दिइएको उनले बताइन् ।

कीर्तिपुरबाट चिनी किन्न सहुलियत पसलमा आएकी पवित्रा थापाको गुनासो पनि उस्तै छ । बजारमा अन्यत्र नपाएकाले सहुलियत पसलमा चिनी किन्न आएको उनले बताइन् ।

उनले दुई किलो चिनी किन्न लामो लाइन बस्नुपर्दा दुःख लागेको उल्लेख गरिन् । सरकारले राम्रो काम गर्न नसक्दा चाडपर्वको मुखमा जनताले दुःख पाएको उनले बताइन् ।

साल्ट ट्रेडिङका विभागीय निर्देशक ब्रजेशकुमार झाले सरकारले आन्तरिक बजारबाट उपलब्ध गराएको ७० टन चिनी भएसम्म उपभोक्तालाई दुई केजीका दरले उपलब्ध गराइने बताए । बजारमा अभावका कारण सहुलियत पसलमा चिनी किन्न आउने उपभोक्ताको भीड रहेको उनको भनाइ छ । न्युज एजेन्सी नेपाल