युद्ध मैदान बन्न पुगेको गाजा सहरको एउटा अस्पतालमा भएको शक्तिशाली विस्फोटमा पाँच सयभन्दा बढीको ज्यान गएको छ । यो निन्दनीय आततायी कुकार्यका लागि द्वन्द्वका दुवै पक्ष इजरायल र प्यालेस्टाइनले एक अर्कालाई दोष दिएका छन् । 

संगीत उत्सवमा सहभागी नागरिकमाथि प्यालेस्टाइनी लडाकु समूह हमासले असोज २० मा एकाएक रकेट बर्साएर हमला गर्‍यो । हमासले गैरसैनिक नागरिकलाई समेत ‘बन्धक’ बनाएर इजरायललाई धम्की दिएको थियो । 

त्यसपछि इजरायलले प्रतिरक्षात्मक आक्रमण सुरु गरेको हो । इजरायली कारबाही र प्यालेस्टाइनी लडाकु समूहहरूबीच भएको युद्धमा अहिलेसम्म ४ हजारभन्दा बढी मारिएका छन् भने घाइते हुनेको सङ्ख्या १५ हजारभन्दा धेरै पुगिसकेको छ । 

गाजाको अस्पतालमा विस्फोट भएपछि बढी चिन्तित देखिएको अन्तर्राष्ट्रिय समुदायको शान्ति स्थापना गर्ने आह्वानलाई भने दुवै पक्षले मानेका छैनन् । फलस्वरूप, हमासको आक्रमणपछि सुरु भएको यसपकटको भिडन्तले ठूलै क्षति पुग्ने जोखिम देखिएको छ ।

गाजामा हमासलाई कमजोरै बनाएर छाड्ने अठोट गरेर इजरायलले थालेको प्रत्याक्रमणबाट पनि अन्ततः निहत्था नागरिकले नै मूल्य चुकाएका छन् । इजरायलको चेतावनीपछि अहिले  गाजाका लाखौं प्यालेस्टाइनी जनता विस्थापित भइसकेका छन् ।

हमास यसपटकको आक्रमणभन्दा पहिले पनि उग्र आक्रामक जत्था नै मानिन्थ्यो । यसपटकको आततायी हमलाले त हमासको आततायी चेहरा उदाङ्गो भएको छ । सांस्कृतिक महोत्सवमा बम बर्साउने तथा मानव बन्धक बनाउने कार्यले हमास आतङ्ककारी संगठन ठहरिएको हो । 

इजरायलको अपेक्षाकृत कट्टरपन्थी सरकार आन्तरिक राजनीतिक कारणले पनि युद्ध विरामको पक्षमा नहुनसक्छ । इरानजस्ता देशहरू इजरायलविरुद्ध एकजुट हुनसक्छन् । त्यसैले संयुक्त राष्ट्रसंघ र शान्तिका पक्षधर अन्तर्राष्ट्रिय समुदाय अग्रसर नभए मध्यपूर्वमा ठूलै विध्वंश मच्चिने जोखिम देखिन्छ ।

यसैले अन्तर्राष्ट्रिय समुदायले तत्काल हस्तक्षेप गर्नु जरुरी छ । पहिले गाजामा मानवीय सहायता पुर््याउने र त्यसपछि इजरायल सरकारलाई आतङ्ककारी समूहमा लक्षित  कारबाहीमात्र सञ्चालन गर्न सहमत गराउन सक्नुपर्छ । यद्यपि, हमासको आक्रमणको निन्दा नगर्ने वा परोक्षरूपमा समर्थन गर्नेहरूलाई भने इजरायलमाथि औँला उठाउने नैतिक अधिकार हुँदैन । 

हमासलाई ‘सिध्याउन’ चाहने इजरायलको प्रतिरक्षात्मक अठोठलाई अस्वाभाविक भन्न सकिँदैन । परन्तु, अन्तर्राष्ट्रिय समुदायको सदस्यका रूपमा भने इजरायलले मानवीय कानुनहरूको पालना गर्नुपर्छ । अन्तर्राष्ट्रिय समुदायले पनि एउटा राष्ट्र र आतङ्ककारी समूहसँग समान व्यवहार गर्न मिल्दैन ।

हमासको अपराधका लागि जनसाधारणलाई सजाय दिन थालियो भने आतङ्ककारीहरू जनसमर्थन बढ्न सक्छ । सम्भवतः इजरायल पनि त्यस्तो होस् भन्ने पक्कै चाहँदैन । संयुक्त राष्ट्रसंघले आफ्नो औचित्य पुष्टि गर्ने यस्तै काममा नेतृत्व लिनुपर्छ ।