विराटनगर । कोसी प्रदेशसभाको बुधबार बोलाइएको बैठकमा मुख्यमन्त्री केदार कार्कीले विश्वासको मत लिँदै छन् । उनलाई राप्रपा र जसपाबाहेकका सबै दलले मत दिने भएका छन् ।‌
 
दलको तयारी अनुसार भए कार्कीले ९३ मध्ये ८५ सांसदको विश्वास छ भन्ने मत प्राप्त गर्नेछन् । नेपाली कांग्रेसका सबै सांसदलाई पक्षमा मत हाल्न पार्टीको केन्द्रीय समितिले पत्राचार गरेको छ । संसदीय दलका नेता उद्धव थापाले राजीनामा दिए पछि केन्द्रलाई चिठी लेखी राय मागेका थिए । केन्द्रले पक्षमा मतदान गर्न निर्देशन दिएको बताइएको छ । कांग्रेसका २९ सांसद छन् । 

नेकपा एमालेका ३९ सांसदले पक्षमा मत हाल्ने प्रमुख सचेतक रेवतिरमण भण्डारीले जानकारी दिएका छन् । 

माओवादी केन्द्रले मुख्यमन्त्री कार्कीको पक्षमा मतदान गर्ने भएको छ । पार्टीको प्रदेश कमिटीले यसबारे निर्णय गरेको प्रदेश अध्यक्ष हर्कबहादुर नेम्वाङले बताए । माओवादी केन्द्रसँग १३ सांसद छन् । 

नेकपा एकीकृत समाजवादीले पनि कार्कीलाई मत दिने भएको छ ।‌ समाजवादी संसदीय दलका नेता राजेन्द्र राईले यसबारे छलफल भएको बताए । समाजवादीका ४ सांसद छन् ।‌ 

राप्रपाले भने कार्कीलाई मत नदिने भएको छ । सांसद अमरबहादुर विष्टले आफूहरुले मत नदिने तय भएको बताएका छन् । कोसी प्रदेशसभामा राप्रपाका ६ सांसद छन् । 

जसपाले पनि मत नदिने जनाएको छ । 

बुधबार बिहान ११ बजेका लागि बोलाइएको  बैठकमा मुख्यमन्त्री कार्कीले विश्वासको मत लिने कार्यसूची छ । उनले विश्वासको मत लिनुअघि सबै दलका नेताहरुसँग छलफल गरेका छन् । 

मुख्यमन्त्री कार्कीले आइतबार पद तथा गोपनीयताको शपथ लिएका थिए । संविधानको धारा १६८ को उपधारा ५ अनुसार एमालेका ३९ र कांग्रेसका ८ जना सांसदको समर्थनमा कार्की मुख्यमन्त्री नियुक्त भएका थिए । गठबन्धनले माओवादी केन्द्रक इन्द्र आङ्वोलाई मुख्यमन्त्रीमा अघि सारेपछि कार्की एमालेका सांसदको साथ लिएर मुख्यमन्त्री बनेका हुन् ।‌

मुख्यमन्त्री कार्कीले आज विश्वासको मत लिने