काठमाडौं । फिफा विश्वकप– २०२६ छनोटको पहिलो चरणअन्तर्गत दोस्रो लेगमा मंगलबार (आज) लाओसविरुद्ध जित्नैपर्ने दबाबसहित मैदानमा उत्रँदै छ । 

यसअघि, दशरथ रंगशालामा भएको पहिलो लेगमा १–१ को बराबरीमा रोकिएपछि दोस्रो चरण प्रवेशका लागि आज नेपाललाई जित्नैपर्ने दबाब छ । फिफाले अवे गोलको जित हटाएका कारण दोस्रो चरणमा प्रवेशका लागि दुवै टिमलाई स्पष्ट जितको आवश्यक छ । खेलको निर्धारित समयमा नतिजा नआए ३० मिनेट अतिरिक्त समय थप गरिनेछ । अतिरिक्त समयमा पनि नतिजा नआए खेलको निर्णय पेनाल्टी सुटआउटबाट हुनेछ ।

नेपाल र लाओसबीच हालसम्म चारपटक प्रतिस्पर्धा भएको छ । त्यसमध्ये तीन खेल नेपालले जित्दा एक खेल बराबरीमा टुंगिएको छ ।

खेलअघि नेपाली टिमका मुख्य प्रशिक्षक भिन्चेन्सो अल्बर्टो एनेसले लाओसविरुद्ध आक्रामक फुटबल खेल्ने बताएका थिए । 

“पहिलो खेलमा लाओसले धेरै समय खेर फालेको थियो । रेफ्रीको निर्णय पनि हाम्रो पक्षमा थिएन । हामीले यो विषय म्याच कमिस्नरमा पनि उठाएका छौँ । दोस्रो लेगका लागि हामीले निकै राम्रो तयारी गरेका छौँ,” उनले भने, “यो खेल नेपाल र मेरो लागि पनि निकै महत्त्वपूर्ण छ । यदि, हामीले अगाडि बढ्ने हो भने हामीले जित्नुपर्छ र यो गाह्रो हुनेछ । तर, हामी भिडन्तको लागि तयार छौँ । हामी आक्रामक फुटबल खेल्नेछौँ ।”

लाओसस्थित न्यु लाओस राष्ट्रिय रंगशालामा हुने खेल नेपाली समयानुसार बेलुका ५ः४५ बजे सुरु हुनेछ ।