काठमाडौं । संस्कृति, पर्यटन तथा नागरिक उड्डयनमन्त्री सुदन किरातीले हवाई भाडामा भएको विसंगतिको हस्तक्षेप ध्वजावाहकले मात्रै गर्न सक्ने बताएका छन् ।

सोमबार त्रिभुवन अन्तर्राष्ट्रिय विमानस्थलको आन्तरिक विमानस्थलतर्फको टर्मिनल भवनहरुमा राखिएका पसलहरु र बोर्डिङ पास कक्षको अनुगमन गर्दै उनले टर्मिनल भवनहरुमा राखिएका सामग्री र हवाई टिकटको भाडा बढी लिएको जनगुनासो बढेपछि अनुगमन गर्नुपरेको बताए ।

अुगमनका क्रममा सरकारले तोकेकोभन्दा बढी भाडा लिएको नभेटिएको बताउँदै उनले उडानमा ढिला नगर्न निर्देशन दिए । लो रेटका टिकटहरु कम र हाई रेटका टिकटहरु बढी बेचेको पाएकाले अबदेखि लो रेटमा टिकट बढी बेच्न निर्देशन दिएको पनि उनले बताए ।

“लो रेट र हाई रेटको बीचमा बढी डिमान्ड भएको बेलामा चलखेल हुनसक्ने भएकाले हाई रेटमा बढी बेच्नुभएछ । आजदेखि हामीले भनेका छौँ, तपाईंहरुले लो रेटका टिकटहरु बढी बेच्नुहोस् र हाई रेट घटाउनुस् भनेका छौँ,” उनले भने, “जनताले गरेका गुनसा अब नआउन् भनेको छु । बजारमा देखिएको भाडाको विसंगतिको हस्तक्षेप ध्वजावाहकले मात्रै गर्नसक्छ ।”

मन्त्री किरातीले पर्यटनबिना नेपालको समृद्धि सम्भव नरहेको भन्दै पर्यटक बढी भित्र्याउन उडानमा सुविधा दिनुपर्ने बताए ।