काठमाडौं । गएको हप्ता २०० भन्दा बढी पर्यटकले दोलखाको शैलुङस्थित क्याम्पिङ टेन्टमा रात बिताए । त्यहाँको पर्यटन प्रवर्द्धनका निम्ति स्पार्क एड्भेन्चर २०२३ आयोजना गरिएको थियो ।

सो क्रममा क्याम्पिङ टेन्टमा पर्यटकले दुई रात बिताउने अवसर पाए । शैलुङमा यति धेरै पाहुना क्याम्पिङ टेन्टमा बसेको सम्भवतः यो नै पहिलोपटक हो । 

शैलुङमा क्याम्पिङ टेन्टको दृश्य निकै आकर्षक देखिन्थ्यो । नेपाल एयरलाइन्सका क्याप्टेन विजय लामा, अभिनेता निखिल उप्रेती, लेखक बुद्धिसागरलगायत व्यक्तिले क्याम्पिङ टेन्टमा मजा लिएका थिए ।

शैलुङबाट चारैतिर नियाल्दा रोल्वालिङ, महालंगुर, अन्नपूर्ण, लाङटाङलगायत हिमशृंखला देख्न सकिन्छ । हरेक सिजन पर्यटकको मन लोभ्याउने शैलुङडाँडा समुद्री सतहदेखि तीन हजार ३०० मिटर उचाइमा छ ।

सय थुम्काको संगम शैलुङमा फरक–फरक जातजातिका फरक–फरक संस्कृति छ ।

तस्बिरहरू : स्पार्क एड्भेन्चर टिम ।