काठमाडौं । राष्ट्रपति रामचन्द्र पौडेलले सत्य अन्वेषण र सम्प्रेषण अहिलेको मिडियाको मुख्य चुनौती भएको बताएका छन् । 

आफ्नै निवासमा पत्रकारहरूलाई बोलाएर शुक्रबार उनले अहिलेको मिथ्या सूचनाले सत्यलाई विस्थापन गर्ने अस्वस्थ प्रतिस्पर्धा चलेको बताए । यसले कहीँ न कहीँ देश, जनता र हाम्रो व्यवस्थालाई नोक्सान पुर्‍याउन सक्नेतर्फ सचेत हुन उनले आग्रह गरे । 

“यस्तो अवस्थामा पत्रकारिता जगतले सत्यतथ्य, सन्तुलित र विश्वसनीय समाचार सम्प्रेषण गरी हामीले लामो संघर्ष र बलिदानबाट प्राप्त गरेको संघीय लोकतान्त्रिक गणतन्त्र, शान्ति, विकास, सुशासन र रुपान्तरणका पक्षमा कलम चलाउनेछ भन्ने मलाई विश्वास छ,” उनले भने । 

राष्ट्रपतिमा निर्वाचित भएपछि लगत्तै भेट गर्ने इच्छा हुँदाहुँदै पनि विविध कारणले ढिलाइ भएको बताए । साथै उनले पत्रकारिता जगत लोकतन्त्रको आधार स्तम्भ भएको भन्दै लामो संघर्ष र बलिदानबाट प्राप्त भएको अहिलेको व्यवस्था सुशासन र रुपान्तरणको पक्षमा कलम चलाउने विश्वास व्यक्त गरे ।