काठमाडौं । भारतका प्रधानमन्त्री नरेन्द्र मोदीको गरेको नेपाली भूमि गुन्जीको भ्रमणको सम्बन्धमा प्रमुख प्रतिपक्षी दल नेकपा (एमाले)ले सरकारको जवाफ माग गरेको छ ।

बिहीबारको प्रतिनिधिसभा बैठकको विशेष समयमा बोल्दै एमाले सांसद सूर्य थापाले मोदीको भ्रमणबारे प्रश्न उठाए । 

भारतीय प्रधानमन्त्री मोदीले नेपाली भूमि गुन्जीको भ्रमण गरेको भन्दै उनले सरकारलाई जानकारी सदनमा जानकारी गराउन माग गरे । 

“मोदीले भ्रमण गरेको सत्य हो कि हैन ? संसद्ले जवाफ चाहन्छ । सभामुखबाट रुलिङ चाहियो,” उनले भने, “नेपाल सरकार किन मौन छ ? किन बेखबर छ । शासकहरूको यस्ता विषयमा विगतको रोग हो यस्तो ? यो सदन बेखबर बन्न मिल्दैन ।”

सांसद थापाले एकपछि अर्को मन्त्री अर्थतन्त्रको संकटपूर्ण अवस्थालाई वेवास्ता गर्दै विदेश भ्रमण किन भइरहेको छ पूर्ण विवरण उपलव्ध गराउन माग गरे ।