काठमाडौं । विद्युतीय सिगरेट (भेप) मार्फत गरिएको नौ किलो सुन तस्करी प्रकरणको अनुसन्धान प्रतिवेदन जिल्ला सरकारी वकिल कार्यालय पुगेको छ । प्रहरीको केन्द्रीय अनुसन्धान ब्यूरो (सीआईबी) अनुसन्धान प्रतिवेदन आइतबार वकिल कार्यालय पेश गरेको हो ।
भेप प्रकरणमा जोडिएका नेकपा (माओवादी केन्द्र) का उपाध्यक्ष एव पूर्वसभामुख कृष्णबहादुर महराका छोरा राहुलसहित चार जनालाई मुद्दा चलाउन राय दिएको सीआईबीका एसएसपी दिनेश आचार्यले जानकारी दिए ।
राहुल १३ भदौमा पक्राउ परेका थिए । उनीसहित भेपमार्फत नौ किलो सुन तस्करी गर्ने समूहका मुख्य व्यक्ति चिनियाँ नागरिक दाओजिन वाङ र उनका गाडी चालक लोकेन्द्र पौडललाईसमेत मुद्दा चलाउन सिफारिस गरिएको छ ।
त्यस्तै ६१ किलो सुन तस्करी आरोपमा पक्राउ परेका बेल्जियम नागरिक दावा छिरिङलाईसमेत मुद्दा चलाउन सीआईबीले सिफारिस गरेको छ । दावा हाल पुर्पक्षको लाथि थुनामा छन् ।
भेसमार्फत गत पुसमा सुन तस्करी भएको थियो । कृष्णबहादुर महराको संलग्नता भने नदेखिएको एसएसपी आचार्यको भनाई छ ।
उक्त सुन भन्सार कार्यालयकै कर्मचारीको मिलोमतोमा चोरी भएको खुलेको थियो । सो अभियोगमा हाल विमानस्थल भन्सारका नासु रेवन्त खड्कासहित सुरक्षा गार्ड निर्मलकुमार विक, भन्सार एजेन्ट दिनेश बस्नेत, व्यापारी वेदप्रकाश अग्रवाल र साहेवराव पाण्डुरङ मरगलेलाई जिल्ला अदालत काठमाडौंले पुर्पक्षका लागि जेल चलान गरेको छ ।
सो सुन चोरी प्रकरणमै जोडिएका दिपेश बस्नेत, गोपाल सुवेदी र रामकेशव थापा फरार छन् ।
