पोखरा । गएको साउन ३० गते गठित गण्डकी प्रदेशसभाका विषयगत समितिले सभापतिको टुंगो लगाएका छन् । शनिबार चारवटै समितिको नेतृत्वमा एकल उमेदवारी परेपछि सभापति निर्विरोध निर्वाचित भएका हुन् ।

प्रदेशसभा सचिवालयका अनुसार सार्वजनिक लेखा समितिको सभापतिमा प्रदेशसभा सदस्य सुधीरकुमार पौडेल, अर्थ तथा विकास समितिको सभापतिमा भोजराज अर्याल, सामाजिक विकास तथा कृषि समितिको सभापतिमा फणिन्द्र देवकोटा र प्रदेश मामिला तथा कानुन समितिको सभापतिमा चम्पादेवी खड्काको उमेदवारी परेको थियो ।

पौडेल प्रमुख प्रतिपक्ष दल नेकपा (एमाले)बाट सभापतिको उमेदवार बनेका थिए । अर्याल र खड्कालाई नेपाली कांग्रेसले उमेदवार बनाएको हो । नेकपा (माओवादी केन्द्र)ले देवकोटालाई सभापतिमा अघि सारेको थियो । नेपाल समाजवादी पार्टीका देवकोटा माओवादी केन्द्रको चुनाव चिह्नबाट प्रदेशसभा सदस्यमा निर्वाचित भएका थिए ।

प्रदेशसभा सचिवालयका कानुन अधिकृत कुमार रिजालले आइतबार बस्ने समितिको बैठकबाट सभापति निर्वाचनको प्रक्रियाले औपचारिकता पाउने बताए । “दलहरूको सहमतिमा एकल मनोनयन परेपछि चारवटै समितिका सभापति निर्विरोध निर्वाचित हुनुभएको छ,” उनले भने ।

प्रदेशसभा सदस्य निर्वाचन भएको सात महिनापछि ‘मिनि ससंद्’ मानिने विषयगत समिति साउन ३० मा गठन भएका थिए । दलहरूबीच समयमै सहमति नजुट्दा सभापति चयनमा पनि झन्डै दुई महिना लागेको हो । रासस