काठमाडौं । राष्ट्रिय जनमोर्चाका अध्यक्ष चित्रबहादुर केसीले युवाहरुलाई विदेश पलायन गराएर सुनियोजित किसिमले मुलुक रित्याउन लागिएको बताएका छन् ।

बिहीबार प्रतिनिधिसभाको बैठकमा बोल्दै अध्यक्ष केसीले नेपालका श्रमिक र विद्यार्थीहरु विदेश पलायन भइरहेका भन्दै त्यसलाई रोक्नुपर्ने बताए । उनले नेपालमा रोजगारी दिन नसके युवाहरु विदेशिए भन्नुको अर्थ पनि नभएको बताए ।

युवाहरु विदेशिएको सम्बन्धमा विशेष एजेन्डा बनाएर संसद्मा छलफल गर्नुपर्ने भन्दै उनले यसरी नै युवापुस्ता विदेश गए आगामी २० वर्षमा मुलुक रित्तिने बताए ।

“नेपालमा विशुद्ध पढ्ने ठाउँ नभएर, सबै बेरोजगार भएर, काम नभएका मान्छे मात्रै गएका छन् भन्ने हुँदै होइन । नेपालमा यस्तो खालको रोग लाग्यो कि बेरोजगारहरु पैसा भएकाले राम्रो शिक्षा लिन जानु बेग्लै कुरा हो, तर यहाँ त के भयो भने मन्त्रीका छोरा, सांसदका छोरा, साहु महाजनका छोरा, धनीमानीका छोरा सबैको एउटै मात्र उद्देश्य के छ भन्दाखेरि नेपालमा केही हुन्न, त्यसकारणले जाने गन्तव्य अमेरिका, युरोप, अष्ट्रेलिया । त्यो गर्न नसक्ने कमसेकम जापान,” उनले भने, “त्यसकारण यो सुनियोजित किसिमले मुलुक रित्याउने स्थिति भएको छ । यो एजेन्डामा संसद्मा हामी सबैले छलफल गर्नुपर्छ ।”