काठमाडौं । सर्वोच्च अदालतले योगराज ढकाल (रिगल) को कैद मिनाहा गर्ने निर्णयबाट पीडित बनेको परिवारलाई सुरक्षा दिन आदेश दिएको छ । 

बिहीबार सर्वोच्चले निवदेक भारती शेर्पाको परिवारलाई निवेदनको टुङ्गो नलागेसम्म सुरक्षा दिन भनेको हो ।

"निवेदक तथा निजका परिवारका सदस्यहरूलाई यथोचित सुरक्षा प्रदान गर्ने गराउने आवश्यक व्यवस्था गर्न नेपाल सरकार, गृह मन्त्रालयलाई लेखी पठाउनू," सर्वोच्चले भनेको छ । 

• रिगलको कैद मिनाहा मुद्दामा सर्वोच्चद्वारा कारण देखाऊ आदेश जारी

संविधान दिवसको अवसरमा ३ असोजमा मन्त्रिपरिषद्को सिफारिसमा राष्ट्रपति रामचन्द्र पौडेलले चेतन मानन्धरको हत्या प्रकरणमा जन्मकैदको सजाय पाएका रिगलको कैद मिनाहा गरेका थिए । मानन्धरकी पत्नी भारतीले सोही निर्णयविरुद्ध सर्वोच्चमा रिट दिएकी थिइन् । 

रिगल घटना भएकाले बेला नेपाली कांग्रेसको युवा संगठन तरुण दलमा आबद्ध थिए ।  हत्या अभियोगमा उनलाई जिल्ला अदालत बाँकेका तत्कालीन न्यायाधीश विष्णु सुवेदीको इजलासले २०७६ साल वैशाखमा दोषी ठहर गर्दै सर्वस्वसहित जन्मकैदको सजाय सुनाएको थियो । 

साथै, उक्त घट्नामा संलग्न अन्य १० जनालाई संलग्नताको प्रकृति हेरर तीन वर्षदेखि १० वर्षसम्म कैद सजाय तोकिएको थियो । रिगलमाथि २०७२ साल असार २८ गते नेपालगञ्जको धम्बोजी चोकमा दिउँसो ३ बजेतिर चेतन मानन्धरमाथि खुँडा प्रहार गरी हत्या गरेको अभियोग थियो ।