काठमाडौं । जापानले धुलिखेल अस्पतालको ‘ट्रमा तथा इमर्जेन्सी सेन्टर’ सुधार परियोजनाका लागि आर्थिक अनुदानस्वरूप तीन अर्ब दुई करोड ९६ लाख जापानी येन (दुई अर्ब ९२ करोड रुपैयाँ) उपलब्ध गराउने भएको छ ।

अनुदान सहयोग नेपाललाई उपलब्ध गराउने सम्बन्धी नोटमा बिहीबार एक कार्यक्रमबीच नेपालका लागि जापानका राजदूत किकुता युताका र अर्थ मन्त्रालयका सचिव कृष्णहरी पुष्करले हस्ताक्षर गरेका छन् ।

“नेपालमा तीव्र गतिमा बढ्दो ट्रमा तथा आकस्मिक बिरामीहरूका लागि स्वास्थ्य सेवा सुदृढ गर्ने र नयाँ ट्रमा तथा इमर्जेन्सी सेन्टर निर्माण गरी स्वास्थ्य सेवाको गुणस्तर सुधार गर्ने र धुलिखेल अस्पतालका लागि आवश्यक स्वास्थ्य उपकरण उपलब्ध गराउने यस परियोजनाको लक्ष्य रहेको छ,” काठमाडौंस्थित जापानी दूतावासद्वारा बिहीबार जारी विज्ञप्तिमा उल्लेख छ ।

नेपालमा बारम्बार आउने विपद्, सवारीको चाप बढेपछि हुने सवारी दुर्घटना, आर्थिक विकाससँग सम्बन्धित आहार परिवर्तनका कारण हुने स्ट्रोक तथा मुटुसम्बन्धी रोगका कारण आकस्मिक बिरामीको संख्या बढ्दै गएको छ ।

यसैकारण अस्पताल सुधार परियोजना आवश्यक परेको दूतावासले जनाएको छ । जापानको अनुदान सहायतामा नयाँ सुविधा सहितको आपत्‌कालीन उपचार कक्ष, अपरेटिङ रुम र इनपेसेन्ट वार्ड,  एमआरआई र सीटी जस्ता उपकरणहरू जडान गरिने छ ।

नोटमा हस्ताक्षर गर्दै राजदूत किकुताले यस परियोजनाले नेपाली जनताको स्वस्थ जीवन सुनिश्चित गर्न र नेपालको विकासलाई प्रवर्द्धन गर्न योगदान पुर्‍याउने विश्वास व्यक्त गरे ।