काठमाडौं । इंग्लिस प्रिमियर लिगको क्लब न्युक्यासल युनाइटेडले यूईएफए च्याम्पियन्स लिगमा फ्रेन्च क्लब पेरिस सेन्ट जर्मेन (पीएसजी)विरुद्ध ४–१ को सहज जित निकालेको छ ।
बुधबार राति घरेलु मैदान सेन्ट जेम्स पार्कमा न्युक्यासलले एकपक्षीय जित हासिल गर्दा मिगुयल अलमिरोन, डान बर्न, सेआन लोङ्स्टाफ र फाबिअन स्चारले गोल गरे । पीएसजीका लागि लुकास हर्नान्डेजले एक गोल फर्काएका थिए ।
१७औँ मिनेटमा अल्मिरोनले गरेको गोलबाट न्युक्यासलले अग्रता बनाएको थियो । ३९औँ मिनेटमा बर्नले घरेलु टिमको अग्रता दोब्बर पारे । ५०औँ मिनेटमा लोङ्स्टाफले न्युक्यासलका लागि तेस्रो गोल गरेका थिए ।
५६औँ मिनेटमा हर्नान्डेजले गोल गर्दै पीएसजी खेलमा फर्कने आस कायम राखेका थिए । तर, इन्ज्युरी समयमा स्चारले गोल गरेपछि न्युक्यासलले फ्रेन्च जायन्टविरुद्ध ४–१ को सहज जित निश्चित गर्यो ।
जितसँगै दुई खेलबाट चार अंक जोडेको न्युक्यासल समूह ‘एफ’को शीर्ष स्थानमा उक्लिएको छ । दोस्रो स्थानको पीएसजीको तीन अंक छ ।
बुधबार राति नै समूह ‘एफ’को अर्को खेलमा एसी मिलान र बोरुसिया डर्टमन्डले गोलरहित बराबरी खेल्दै अंक बाँडे । मिलान दुई अंकसहित तालिकाको तेस्रो स्थानमा छ । एक अंकको डर्टमन्ड पुछारमा छ ।
