काठमाडौं । संयुक्त राष्ट्रसंघका महासचिव एन्टोनियो गुटेरेस अक्टोबरको दोस्रो साता नेपाल भ्रमणमा आउने भएका छन् । 

स्रोतका अनुसार राष्ट्रसंघका महासचिव अक्टोबर १४ (असोज २७ गते) मा नेपाल आउने गरी तयारी भइरहेको छ । 

प्रधानमन्त्री पुष्पकमल दाहाल ‘प्रचण्ड’ संयुक्त राष्ट्रसंघको ७८औँ महासभामा भाग लिन अमेरिकाको न्यूयोर्क जाँदा त्यही महासचिव गुटेरेससँग भेटवार्ता गरेका थिए । 

सोही भेटमा प्रधानमन्त्री प्रचण्डले उनलाई नेपाल भ्रमणको निम्तो दिएका थिए भने उनले त्यति नै बेला नेपाल भ्रमणमा आउने प्रतिवद्धता जनाएका थिए । 

“राष्ट्रसंघका महासचिवको उच्च प्राथमिकतामा नेपाल रहेको छ,” प्रधानमन्त्री प्रचण्डका प्रमुख राजनीतिक सल्लाहकार हरिबोल गजुरेलले बाह्रखरीसँग भने, “नेपालको शान्ति प्रक्रियामा उहाँको विशेष चासो छ ।”

नेपालको शान्ति प्रक्रियामा राष्ट्रसंघ जोडिएका कारण पनि महासचिवले बढी चासो दिएको बुझाइ गजुरेलको छ । 

नेपालको शान्ति प्रक्रियाको अलावा जलवायु परिवर्तनका असर र अतिकम विकसित राष्ट्रको हैसियतले नेपालले राखेका अपेक्षमा विषयमा उनले नेपाल भ्रमणका बेला छलफल गर्ने उनले जनाए । 

“नेपालको शान्ति प्रक्रियाको बाँकी काम टुङ्ग्याउनको लागि अन्तर्राष्ट्रिय सहयोग जुटाउन उहाँले पहल गर्ने वचन दिनुभएको छ । यसैकराण उहाँ सरोकारवालहरुसँग छलफल गर्न नेपाल आउन लाग्नु भएको हो,” गजुरेलले भने ।