काठमाडौं । नेपाल टेलिकमको निमित्त प्रबन्ध निर्देशकको जिम्मेवारी संगीता पहाडीले पाएकी छन् । बुधबार सञ्चार तथा सूचना प्रविधि मन्त्रालयले पहाडीलाई निमित्त प्रबन्ध निर्देशकको जिम्मेवारी दिएको हो ।

यसअघि सोमबार टेलिकमका प्रबन्ध निर्देशक रहेका सुनिल पौडेलविरुद्ध भ्रष्टाचारको मुद्दा दर्ता भएपछि टेलिकमको प्रबन्ध निर्देशकको पद खाली भएको थियो ।

सञ्चार तथा सूचना प्रविधि मन्त्रालयका सहसचिव एवं प्रवक्ता नेत्रप्रसाद सुवेदीले पहाडीलाई निमित्त प्रबन्ध निर्देशकको जिम्मेवारी दिइएको बताएका हुन् ।

अख्तियार दुरुपयोग अनुसन्धान आयोगले नेसनल पेमेन्ट गेटवेको खरिदमा भ्रष्टाचार भएको भन्दै पौडेल, पूर्वसचिव र वहालवाला सचिवसहित ९ जनाविरुद्ध मुद्दा दर्ता गरेको थियो ।

कार्यक्रममै थिएन पेमेन्ट गेटवे, सचिव मरासिनीले गोप्यरूपमा निकासा गरेका थिए रकम !

पौडेल टेलिकमको प्रबन्ध निर्देशकमा आउनुअघि नै विवादित थिए । विवादित व्यक्तिलाई टेलिकमको नेतृत्वमा ल्याइएको भन्दै त्यतिबेला विवाद समेत भएको थियो ।