धनगढी । धनगढी क्रिकेट एकेडेमी (डीसीए) को आयोजनामा स्टेपिङ स्टोन इंग्लिस स्कुल जुनियर कप क्रिकेट प्रतियोगिता मंसिर अन्तिम सातादेखि सुरु हुने भएको छ । 

प्रतियोगिता आगामी मंसिर २५ गतेबाट धनगढीको फाप्ला क्रिकेट मैदानमा हुने भएको हो । १० कक्षासम्मका विद्यार्थीहरूले भाग लिन पाउने प्रतियोगितामा धनगढीका १६ वटा स्कुलहरूको सहभागिता हुनेछ । 

प्रतियोगितालाई धनगढीको स्थापित स्टेपिङ स्टोन इंग्लिस स्कुलले मुख्य प्रायोजन गरेको छ । स्कुलका संस्थापक तथा प्राचार्य रामजी हमाल र डीसीएका प्रबन्धक समुयल न्यौपानेले मंगलबार एक कार्यक्रमबीच मुख्य प्रायोजक सम्झौतामा हस्ताक्षर गरे । 

सम्झौता पश्चात प्राचार्य हमालले सुदूरपश्चिम क्रिकेटको उर्बर भूमि रहेकाले यहाँका बालबालिकाहरूमा ग्रास रुट लेभलको क्रिकेट विकासका लागि आफूहरूले सहकार्य गरेको बताए । 

यस्तै, प्रबन्धक न्यौपानेले मुख्य प्रायोजक गरेकोमा स्कुललाई धन्यवाद दिँदै उक्त प्रतियोगिताले नयाँ खेलाडी निकाल्न सहयोग पुग्ने विश्वास व्यक्त गरे । 

प्रतियोगिताको विजेताले ३० हजार नगद पुरस्कार पाउनेछ । यस्तै, उपविजेताले १५ हजार तथा म्यान अफ द म्याच तथा सर्वोत्कृष्ट खेलाडीका लागि पनि पुरस्कारको व्यवस्था गरिएको डीसीएले जनाएको छ ।  

लिग कम नकआउट आधारमा हुने प्रतियोगिताको इभेन्ट म्यानेजरमा शुभम पनेरु तथा कार्यक्रम संयोजक सन्दीप भट्ट छन् ।