काठमाडौं । हुन्डाईको आधिकारिक वितरक लक्ष्मी इन्टरकन्टिनेन्टलले नयाँ विद्युतीय गाडी (ईभी) कोना जीएल सार्वजनिक गरेको छ।
कम्पनीले कोना ईभीको सुरुवाती भेरियन्ट जीएलको मूल्य ५९ लाख ९६ हजार रुपैयाँ तोकेको छ ।
यस्तै, जीएल–एस भेरियन्टको मूल्य ६४ लाख ९६ हजार रुपैयाँ रहेको कम्पनीले जनाएको छ ।
विद्युतीय गाडीको बढ्दो मागलाई मध्यनजर गर्दै कम्पनीले आफ्नो सर्वाधिक सफल इलेक्ट्रिक मोडल कोनाको जीएल भर्सन ल्याएको बताएको छ ।
यस्तो छ कोना जीएल
कम्पनीले क्रसओभर दाबी गरेको कोना जीएलमा उच्च ड्राइभिङ रेन्ज, नयाँ सुरक्षा फिचर र एड्भान्स कनेक्टिभीटी रहेको बताएको छ ।
३९.२ किलोवाट आवरको ब्याट्री रहेको गाडी एक पटकको फुल चार्जमा ३०५ किलोमिटरसम्म गुड्ने कम्पनीको भनाइ छ ।
गाडीलाई १०० किलोवाट डीसी फास्ट चार्जरले ५४ मिनेटमा ८० प्रतिशत चार्ज गर्न सकिने छ ।
गाडीमा स्मार्ट सेन्स सेफ्टी सुइट, रिजेनेरेटीभ ब्रेकिङ, प्याडल सिफ्टर, ड्राइभ वाइ वायर सिस्टम तथा क्लाइमेट प्रि–सेटिङ जस्ता आधुनिक सुरक्षा फिचर रहेको कम्पनीले जनाएको छ ।
आठ इन्चको टचस्क्रिनयुक्त भिजुअल न्याभिगेसन सिस्टम रहेको गाडी नेपाली बजारमा एट्लास ह्वाइट, साइबर ग्रे, ग्यालाटिक ग्रे, पल्स रेड, सर्फी ब्लु तथा डार्क नाइटजस्ता कलर अप्सनमा उपलब्ध हुने कम्पनीले बताएको छ ।
