काठमाडौं । नेकपा (एमाले)को वाग्मती प्रदेशको नेतृत्व चयनका लागि निर्वाचन हुने निश्चितजस्तै भएको छ । देश संघीयतामा गएपछि भइरहेको प्रथम अधिवेशन नेतृत्व छान्न चुनावतिर अघि बढेको हो । 

एमालको निर्वाचन आयोगका अनुसार भोलिबाट निर्वाचन प्रक्रिया सुरु हुने छ । 

वाग्मतीको निर्वाचनमण्डलका सदस्यसमेत रहेका स्थायी कमिटी सदस्य शेरबहादुर तामाङका अनुसार बुधबार (भोलि) उमेदवारी दर्ता हुने छ भने बिहीबार निर्वाचन हुने छ ।

भोलि बिहान ८ बजे मतदाता नामावली प्रकाशन गरिने छ । अन्तिम नामावली ९ बजे प्रकाशित हुने तालिका छ । बिहान ९ बजेदेखि ११ बजेसम्म उमेदवारी दर्ता हुने छ । 

भोलि अपराह्न ४ बजे उमेवारको नामावली प्रकाशन हुने छ । ५ बजे अन्तिम नामावली प्रकाशन गर्ने तय भएको छ । बिहीबार बिहान ११ बजे मतदान हुने तालिका प्रकाशन भएको छ ।

नेताहरूले भने वाग्मती अधिवेशन सर्वसम्मत टुंगिने सम्भावना अझै रहेको दाबी गर्न छाडेका छैनन् । एमालेकी उपाध्यक्ष अष्टलक्ष्मी शाक्य सहमतिका लागि अझै पहल गरिने बताउँछिन् । 

“निर्वाचनको तालिका पनि बनेको छ । सहमतिका लागि अझै पहल गर्छौं । सहमतिको सम्भावना बाँकी नै छ,” उनी भन्छिन् । 

प्रतिनिधिहरूको भावना अनुसार अघि बढ्ने शाक्यले बताइन् ।

“प्रतिनिधिहरूको भावना पनि हेर्छाैं । चुनाव नै हुनुहुँदैन भन्ने पक्षमा हामी छैनौँ,” उनले बाह्रखरीसँग भनिन्, “चुनाव नै भए पनि स्वस्थ प्रतिस्पर्धा हुने छ ।”

एमालेका सचेतक महेश बर्तौला पनि सहमतिको सम्भावना रहेको बताउँछन् ।

“सहमतिको सम्भावना पनि छ,” उनी भन्छन् ।

 तर, एमालेका एक पदाधिकारी सहमतिको सम्भावना क्षीण भएकाले अब चुनाव नै हुने देख्छन् ।

“प्रतिनिधिहरूको चाहना चुनाव नै भइदियोस् भन्ने छ । अब चुनावको बाटोमा अघि बढ्यो । हामी पनि टिपेर ल्याउनुहुँदैन भन्ने पक्षमा छौँ,” उनी भन्छन्, “ प्रतिनिधिहरूले नेतृत्व छान्न पाउनुपर्छ । केन्द्रीय नेताहरू नै अघि बढेकाले अब मिल्ने सम्भावना देखिँदैन ।

अर्का नेताका अनुसार अहिलेसम्म उमेदवारका आकांक्षीहरूलाई एक ठाउँ राखेर सहमतिका लागि छलफल भएको छैन । त्यो वातावरण अहिलेसम्म बनिसकेको छैन । खुला सत्र र बन्द सत्रको व्यस्तताका कारण पनि छलफल हुन पाएको छैन ।

“सर्वसम्मति गर्ने त भनिएको छ । तर, अहिलेसम्म कुनै नेताले समवन्य गर्नुभएको छैन,” ती नेता भन्छन्, “अब आकांक्षीहरू अघि बढिसकेकाले त्यो सम्भावना कमै छ ।”

वाग्मती एमालेको अध्यक्ष दाबी गरिरहेका केन्द्रीय सदस्य कैलाश ढुंगेल पनि सहमति हुने सम्भावना कमै देख्छन् । उनी निर्वाचनको प्रचारमा निस्किसकेको प्रतिनिधिहरूसँगको भेटले पनि दर्शाउँछ । 

“सहमति भए भइहाल्छ । नभए निर्वाचन हुन्छ,” उनी भन्छन् ।

एमाले पोलिट ब्युरो सदस्य ईश्वरी रिजाल सहमति नभए निर्वाचन हुने बताउँछन् । 

“अध्यक्षले हिजै प्रस्ट भनिसक्नुभएको छ । चुनाव गरे पनि प्यानल बनाउन पाइँदैन,” रिजाल भन्छन्, “सर्वसम्मति नभए चुनाव हुन्छ ।”

एमालेको वाग्मती नेतृत्वका लागि केन्द्रीय सदस्यहरू कैलाश ढुंगेल र कृष्ण दाहाल मुख्य प्रतिष्पर्धीका रूपमा देखिएका छन् । त्यस्तै, नेता कृष्णभक्त पोखरेल, वाग्मतीका अध्यक्ष केशवराज पाण्डे, वाग्मतीका पूर्वसभामुख सानु श्रेष्ठले पनि आकांक्षा राखेका छन् । तर, चुनाव नै हुँदा केन्द्रीय सदस्य दुईजना मात्रै मैदानमा हुने नेताहरूको दाबी छ । अरू आकांक्षीहरू चुनावी प्रतिपस्पर्धामा नउत्रिने प्रतिनिधिहरूको आकलन छ ।

सोमबार भृकुटीमण्डपमा अधिवेशनको उद्घाटन भएको थियो । अधिवेशनको उद्घाटन गर्दै अध्यक्ष केपी शर्मा ओलीले चुनावमा प्यानल बनाए उमेदवारी खारेज हुने चेतावनी दिएका थिए । प्यानल बन्न नदिने भन्ने अभिव्यक्तिले चुनाव भने हुन नरोक्ने संकेत गरेको बुझाइ नेताहरूको छ ।

एमालेले यसपटक जनप्रतिनिधिहरूलाई अधिवेशनमा चुनाव लड्न दिएको छैन । केन्द्रीय सदस्यहरूलाई भने चुनाव लड्न रोकेको छैन । प्रदेश अध्यक्षलाई पोलिट ब्युरोको मान्यता दिएको छ । सांसदहरूलाई चुनाव लड्न नदिएकाले पनि वातावरण अझै शान्त भएको बुझाइ एक नेताको छ ।

“सांसदहरूलाई चुनाव लड्न रोकिएको छ । केन्द्रीय सदस्यहरूलाई नरोक्दा यत्तिको भयो । सांसदहरूलाई नरोकेको भए माहोल अझै जटिल बन्ने थियो,” ती नेताको विश्लेषण छ । 

अधिवेशनको बन्दसत्र भने कमलादीस्थित प्रज्ञा भवनमा भएको थियो । अब चुनावी प्रक्रिया भने पार्टी कार्यालय च्यासलमा हुने छ । 

चुनाव विद्युतीय भोटिङ मेसिनबाट हुने छ । राम लक्ष्मण भोटिङ मेसिन प्रयोग गर्ने तयारी छ । 

राम लक्ष्मण भोटिङ मेसिनका लक्ष्मण रिमालले भोलि नोमिनेसन भए त्यसैअनुसार मेसिन फिटिङ गरिने बताए । 

“नोमिनेसन नै भएको छ । त्यसको काम सकिएपछि मेसिन फिटिङको काम हुन्छ,” उनले बाह्रखरीसँग भने ।

अधिवेशनले पाँच पदाधिकारीसहित २४० सदस्यीय कमिटी चयन गर्ने छ ।