काठमाडौं । नेपाल क्रिकेट संघ (क्यान)को आगामी चार वर्षको नेतृत्वका लागि आज मतदान हुँदै छ । नयाँ कार्यसमिति चयनका लागि हुने मतदानमा सहभागी मतदाता नामावली प्रकाशित भएको छ ।

क्यानको नयाँ कार्यसमितिका लागि अध्यक्षमा चतुरबहादुर चन्द र विनय राजभण्डारीले उमेदवारी दिने घोषणा गरेका छन् ।

चन्द प्यानलबाट सचिवमा पूर्वकप्तानसमेत रहेका पारस खड्का र कोषाध्यक्षमा पदम खड्काले उमेदवारी दिने निश्चित भएको छ । सचिवमा पारसलाई प्रशान्तविक्रम मल्लले चुनौती दिनेसमेत पक्का भएको छ ।

काठमाडौंको बानेश्वरस्थित एभरेष्ट होटेलमा हुने निर्वाचनका लागि ८५ जना मतादाताको नामावली प्रकाशित भएको छ । क्यानको विधानअनुसार एक जिल्ला संघबाट एक प्रतिनिधि र केन्द्रीय कार्यसमिति गरी ८६ जना प्रतिनिधिले मत हाल्न पाउनेछन् । तर, झापाबाट मनोज कटुवाल र लाक्पा लामा गरी दुईजना प्रतिनिधि आएकाले मताधिकार खोसिएको छ । यसकारण आज हुने निर्वाचनमा ८५ मतदाताले मत हाल्नेछन् ।