विराटनगर । कोसी सरकारले बजेटसम्बन्धी अध्यादेश प्रतिस्थापन गर्न गठबन्धन सरकारले ल्याएको विधेयकलाई समेत समेटेर बजेट पारित गराउने तयारी गरेको छ । प्रदेश सभाको हिउँदे अधिवेशन सुरु गरेर प्रतिस्थापन विधेयक ल्याउने तयारी भएको एमाले कोसी प्रदेश संसदीय दलका प्रमुख सचेतक रेवतिरमण भण्डारीले जानकारी दिए ।

संसदीय पत्रकार मञ्च कोसी प्रदेशले बिहीबार विराटनगरमा आयोजना गरेको ‘माननीयसँग संसदीय पत्रकार’ विषयक अन्तरसंवादमा भण्डारीले भने, “बजेट शून्यता हटाउन दोस्रोपटक सरकारले अध्यादेशमार्फत बजेट ल्याएको छ । अब प्रतिस्थापन विधेयक ल्याएर पारित गराउने तयारी छ । तर, गठबन्धन सरकारले अघिल्लो अध्यादेश प्रतिस्थापन गर्न ल्याएको विधेयकलाई समेत समेटिने छ ।”

भण्डारीले गठबन्धनले प्रतिस्थापन विधेयकमा समेटेका विकाससँग सम्बन्धित योजना काट्ने कुनै तयारी नभएको बरु छलफल गरेरै अघि बढ्ने तयारी रहेको सुनाए । 

तत्कालीन मुख्यमन्त्री हिक्मत कार्कीले जेठ ३२ गते आर्थिक र विनियोजन अध्यादेशमार्फत प्रदेशको बजेट सार्वजनिक गरेका थिए । त्यसबेला सरकारले क्षेत्रगत नीति तथा कार्यक्रमहरू कार्यान्वयनका लागि बजेट विनियोजन र स्रोत व्यवस्थापनका लागि रु. ३६ अर्ब २४ करोड ३५ लाख १० हजारको बजेट ल्याएको थियो ।

सर्वोच्च अदालतको परमादेशपछि प्रदेश सभामा सबैभन्दा ठूलो दलको हैसियतमा एमालेका हिक्मत कार्की पुनःमुख्यन्त्री बनेका छन् । कांग्रेसका उद्धव थापा नेतृत्वको सरकारले बजेट अधिवेशन अन्त्य गरेपछि सदनमा प्रस्तुत भएको प्रतिस्थापन विधेयक पारित हुन नसक्दा प्रदेशमा बजेट शून्यता भएको थियो । कार्की मुख्यमन्त्री बनेसँगै उनैले फेरि भदौ २४ गते बजेट सम्बन्धी अध्यादेश जारी गरेका थिए ।

कार्कीले पहिलोपटक जारी गरेको आर्थिक र विनियोजन अध्यादेश प्रतिस्थापन विधेयकमार्फत ६० दिनभित्र प्रदेश सभाबाट पारित भइसक्नुपर्ने थियो । तर, उनले विश्वासको मत प्राप्त गर्न नसकेपछि असार १५ मै सरकार अल्पमतमा पर्‍यो । त्यसपछि गठबन्धनका थापाको नेतृत्वमा सरकार बन्यो । बजेट अधिवेशन अन्त्य नहुँदै आर्थिक मामिला तथा योजनामन्त्री बाबुराम गौतमले प्रतिस्थापन विधेयक सभामा पेस गरे । त्यसउपर छलफल भई पारित हुन पाएन । 

थापा नेतृत्वको सरकारले भदौ ६ गते संसद्को चालु तेस्रो अधिवेशन अन्त्य गरिदियो । बजेट भदौ १० गतेसम्ममा पास हुनुपर्ने थियो । त्यो नहुँदा कोसी प्रदेश बजेट शून्यतामा गएको थियो ।