काठमाडौं । काठमाडौंमा जारी शिक्षक आन्दोलनका क्रममा बिहीबार सुनसरीको बर्जु गाउँपालिकाका शिक्षक माइतीघरमा बसेर माइन्युटमा हाजिर गरिरहेका देखिए । गाउँपालिकाका सबै सामुदायिक विद्यालयबाट आएका शिक्षकले एउटै माइन्युटमा हाजिरी गरेको उनीहरूले बताए ।

भक्तपुरको अरनिको माविकी एक शिक्षकले आफ्नो विद्यालयबाट आन्दोलनमा सहभागी हुन ३४ जना हाजिरकापी बोकेरै काठमाडौं आएको बताइन् । बुधबार र बिहीबारको हाजिर प्रदर्शनस्थलमै बसेर गरेको उनले सुनाइन् ।

विद्यालय शिक्षा विधेयक, २०८० को विरोधमा काठमाडौंकेन्द्रित आन्दोलनमा सहभागी अधिकांश शिक्षकले यहीँ बसेर हाजिर गरेका छन् । विद्यालय बन्द गरेर आएका उनीहरूले माइन्युटमा ‘काजमा रहेको’ व्यहोरा खुलाएका छन् ।

दैनिक रूपमा नेपाल शिक्षक महासंघलाई हाजिर बुझाउने र सोही आधारमा विद्यालयमा आफ्नो उपस्थिति कायम गराउने उनीहरूको भनाइ छ । आन्दोलनका क्रममा प्रभावित पठनपाठन भने उनीहरूले सार्वजनिक बिदा र शनिबार समेत कक्षा सञ्चालन गरेर पूरा गर्ने बताएका छन् ।

सरकारका तर्फबाट शिक्षा, कानुन र अर्थसहितको मन्त्रीस्तरीय टोली वार्तामा नबसेसम्म आन्दोलन नरोक्ने शिक्षक महासंघले जनाएको छ ।