काठमाडौं । साविक विजेता भारतले साफ यू–१९ च्याम्पियनसिपको पहिलो खेलमा बंगलादेशविरुद्ध ३–० को सहज जित निकालेको छ । 

बिहीबार त्रिपुरेश्वरस्थित दशरथ रंगशालामा सम्पन्न खेलमा भारतलाई सहज जित दिलाउन ज्वज्वम्सार गोयरी नोएबा, मैतेई र अर्जुन सिंहले गोल गरे । 

भारतले खेलको पहिलो मिनेटमै अग्रता बनाएको थियो । खेलको ३३औँ सेकेन्डमा ज्वज्वम्सार गोयरीले गोल गर्दै भारतलाई अग्रता दिलाएका थिए । पहिलो हाफको इन्जुरी समयमा नोएबा मैतेईले गोल गर्दै भारतको अग्रतालाई दोब्बर पारेका थिए ।

पहिलो हाफमा दुई गोल गरेको भारतले दोस्रो हाफमा एक गोल थप्यो । ९०औँ मिनेटमा अर्जुन सिंहले गोल गरेपछि भारतले साविक उपविजेता बंगलादेशविरुद्ध ३–० को सहज जित निश्चित गर्‍यो। 

जितसँगै तीन अंक जोडेको भारत समूह 'बी' को शीर्ष स्थानमा उक्लिएको छ । यो समूहमा भारत र बंगलादेशसँगै भुटान छ । 

भारतले अब सोमबार भुटानविरुद्ध खेल्नेछ ।