काठमाडौं । साफ यू–१९ च्याम्पियनसिपको पाँचौँ संस्करण आजदेखि नेपालमा सुरु हुँदै छ । त्रिपुरेश्वरस्थित दशरथ रंगशालामा हुने प्रतियोगितामा बिहीबार दुई खेल हुनेछन् ।

यो संस्करणमा दक्षिण एसियाका ६ टिम सहभागी छन् । फुटबल एसोसिएसनको विवादका कारण श्रीलंकाले प्रतियोगितामा सहभागिता जनाएको छैन ।

समूह ‘ए’मा घरेलु टिम नेपालसँगै माल्दिभ्स र पाकिस्तान छन् । समूह ‘बी’मा साविक विजेता भारत, साविक उपविजेता बंगलादेश र भुटान छन् ।

प्रतियोगिताको उद्घाटन खेलमा आज भारत र बंगलादेशबीच प्रतिस्पर्धा हुनेछ । दशरथ रंगशालामा हुने यो खेल दिउँसो १ः३० बजे सुरु हुनेछ । दोस्रो खेलमा नेपाल र पाकिस्तान आमनेसामने हुनेछन् । यो खेल साँझ ५ः३० बजे सुरु हुनेछ ।

सन् २०१५ देखि सुरु भएको प्रतियोगिताको पहिलो संस्करण नेपालले नै जितेको थियो । त्यसयता चार संस्करण आयोजना भइसक्दा नेपाल र भारतले समान दुईपटक उपाधि जितेका छन् ।