काठमाडौं । साफ यू–१९ च्याम्पियनसिप बिहीबारदेखि नेपालमा सुरु हुँदै छ । प्रतियोगिताका लागि श्रीलंकाबाहेक दक्षिण एसियाका ६ टिमले प्रतिस्पर्धा गर्दैछन् । 

च्याम्पियनसिपको पूर्वसन्ध्यामा आयोजित पत्रकार सम्मेलनमा नेपाली टिमका मुख्य प्रशिक्षक सुनिल श्रेष्ठले घरेलु टिमको लक्ष्य उपाधि भएको प्रतिक्रिया दिए ।

“हाम्रो लक्ष्य भनेको सुरुमा पहिलो चरणबाट सेमिफाइनलमा पुग्नु हो । सेमिफाइनलपछि फाइनलको लागि फाइट गरेर फाइनल जित्ने नै हो,” प्रशिक्षक श्रेष्ठले भने, “सन् २०१५ मा नेपालले यस प्रतियोगिताको उपाधि जित्दा म सहायक प्रशिक्षक थिए । यसपटक पनि घरेलु मैदानमा हुँदा समर्थकको साथ पनि हुन्छ । खेलाडीहरू पनि आत्मविश्वासी छन् । यसैकारण राम्रो नतिजा ल्याउने विश्वास छ ।”

उनले तयारीका लागि छोटो समय पाए पनि राष्ट्रिय टिमसँग अभ्यास खेल खेल्दा आफ्नो टिम आत्मविश्वासी बनेको बताए ।

“तयारी एकदमै राम्रो भइराखेको छ । यसपटक समय अलि कम भएर राष्ट्रिय टिमसँग तयारी खेलहरू खेल्यौं । राष्ट्रिय टिमसँगको खेलका लागि टिम आत्मविश्वासी बनेको छ,” प्रशिक्षक श्रेष्ठले थपे, “तयारी खेलहरूका कारण हामीले ओपन सेलेक्सनबाट आएका खेलाडीहरूलाई पनि टिममा एडजस्ट गरिसकेका छौँ । सबैले हार्ड वर्क गरिरहेका छन् । ओपन सेलेक्सनबाट आएको भए पनि सबै खेलाडीहरू खेलिरहेका थिए । ए डिभिजनमा नभए पनि बी र सी डिभिजन लिगमा खेलिरहेका थिए ।”

नेपाली टिमका कप्तान जियारथ सेखले छोटो समयमा नेपाली टिमले राम्रो तयारी गरेको बताए ।

“तयारी सानो समयमा पनि राम्रो भइरहेको छ । भोलिको नतिजा राम्रो हुनेछ भन्ने आशा छ,” कप्तान जियारथले भने ।

बिहीबारदेखि सुरु हुने प्रतियोगिताको आफ्नो खेलमा नेपालले पाकिस्तानसँग खेल्नेछ । नेपाल प्रतियोगिताको समूह ‘ए’ मा छ । यो समूहमा नेपालसँगै पाकिस्तान र माल्दिभ्स छन् ।

यस्तै, समूह ‘बी’ मा भारत, बंगलादेश र भुटान छन् । प्रतियोगिताको पहिलो खेलमा भने भोलि दिउँसो समूह ‘बी’ का भारत र बंगलादेश भिड्ने तालिका छ । च्याम्पियनसिपका सबै खेलहरू त्रिपुरेश्वरस्थित दशरथ रंगशालामा हुनेछ ।