काठमाडौं । पोर्चुगिज फरवार्ड जाओ फेलिक्सले दुई गोल गरेपछि यूईएफए च्याम्पियन्स लिगमा स्पेनिस क्लब बार्सिलोनाले बेल्जियमको क्लब एन्टवार्प एफसीविरुद्ध ५–० को फराकिलो जित निकालेको छ ।

घरेलु मैदान स्टाडियो ओलम्पिको लुइस कम्पनिसमा भएको खेलमा बार्सिलोनाका फेलिक्सले दुई गोल गर्दा रोवर्ट लेवान्डोवस्की र गाभीले समान एक गोल गरे । बार्सिलोनाले एक गोल भने एन्टवार्पका जेले बाटाइलीबाट आत्मघाती उपहार पाएको थियो ।

फेलिक्स खेलको ११औँ मिनेटमा गोल गर्दै बार्सिलोनालाई अग्रता दिलाएका थिए । १९औँ मिनेटमा लेवान्डोवस्कीले बार्सिलोनाको अग्रता दोब्बर पारे । त्यसको तीन मिनेटपछि नै बाटाइलीबाट आत्मघाती गोल पाएपछि बार्सिलोनाले पहिलो हाफमा ३–० को अग्रता बनाएको थियो ।

५४औँ मिनेटमा गाभीले गोल गरेपछि बार्सिलोनाले अग्रतालाई ४–० मा पुर्‍यायो । ६६औँ मिनेटमा फेलिक्सले दोस्रो गोल गर्दा बार्सिलोनाले अग्रतालाई ५–० मा पुर्‍याएको थियो ।

गत सिजन च्याम्पियन्स लिगको समूह चरणबाटै बाहिरिएको बार्सिलोनाले यो जितसँगै समूह ‘एच’ मा तीन अंक जोडेको छ । नयाँ सिजनको पहिलो खेलमै हार बेहोरेको एन्टवार्प समूहको पुछारमा छ ।

मंगलबार नै भएको समूह ‘एच’को अर्को खेलमा एफसी पोर्टोले सख्तर डोनेस्कलाई ३–१ ले हरायो । पोर्टोको जितमा गलेनोले दुई र मेहदी टरेमीले एक गोल गरे । डोनेस्कका केभिन केल्सीले एक गोल फर्काएका थिए ।

जितसँगै तीन अंक जोडेको पोर्टो समूहको दोस्रो स्थानमा उक्लिएको छ । अंकविहीन सख्तर डोनेस्क तालिकाको तेस्रो स्थानमा छ ।