विराटनगर । नेपाली कांग्रेसका महामन्त्री विश्वप्रकाश शर्माले कांग्रेस ब्यान्ड बाजा नभएर नौमती बाजाजस्तो भएको बताएका छन् ।

झापाको दमकमा पार्टीको क्षेत्र नं ५ को प्रथम क्षेत्रीय सम्मेलनमा शुक्रबार बोल्दै शर्माले भने, “ब्यान्ड बाजामा मानिस एकक्षण रमाउन सक्लान्, तर सधैँ प्रिय लाग्ने बाजा त नौमती नै हो । पञ्चेबाजा नै हो ।”

शर्माले नौमती बाजाजस्तै जनताले बिर्सिन नसक्ने पार्टीको रुपमा कांग्रेस रहेको दाबी गरे ।

“देश बिग्रियो, पार्टी बिग्रियो, नेता बिग्रिए, सभापति भएन, उ भएन वा त्यो भएन, बर्बादै भो भनेर कोकोहोला गर्नुभन्दा आफ्नै ठाउँ, जनताका समस्यासँग नजिक भएर सुख, दुःखमा साथ दिनुपर्छ,” शर्माले भने, “कांग्रेस मुलुकको अभिभावक पार्टी हो । सशस्त्र द्वन्द्वको चपेटाबाट उन्मुक्ति दिलायो । संविधान दिलाउन होस् वा गणतन्त्र ल्याउन कांग्रेसकै नेतृत्वमा सम्भव भयो ।”

कांग्रेसबाट निर्वाचन जितेका स्थानीय तहका जनप्रतिनिधिदेखि अन्य कार्यकर्तालाई समेत जनताको सेवालाई प्राथमिकतामा राखेर काम गर्न उनले आग्रह गरे । जनप्रतिनिधिले काम गर्दा पार्टी नहेरी जनताको सामूहिक स्वार्थलाई केन्द्रमा राख्नुपर्ने उनको सुझाव थियो ।

महामन्त्री शर्माले भ्रष्टाचार मुद्दा लागेका पार्टी नेताहरुलाई बचाउने वा जोगाउने खेलमा कांग्रेस नलाग्ने स्पष्ट पारे । उनले भने, “मुद्दाको किनारा लगाउने अदालत र सम्बन्धित निकाय हुँदाहुँदै शरणार्थीसम्बन्धीका अथवा ललितानिवास वा अरु जो कोही उम्कनु हुँदैन ।”

पार्टी संगठनलाई चलायमान बनाउन आगामी असोजको पहिलो साता बस्ने केन्द्रीय समिति बैठकले थप कार्यक्रमहरु ल्याउने शर्माले बताए ।

कांग्रेस क्षेत्रीय सभापति ढुण्डीराज भण्डारीले सांगठनिक, सामाजिक तथा आर्थिक प्रतिवेदन प्रस्तुत गर्दै तल्लो तहका कार्यकर्तामा रहेको निरासाको सम्बोधन हुनुपर्ने बताए ।