काठमाडौं । संविधानसभाका अध्यक्ष, नेकपा (एमाले)का उपाध्यक्ष एवं सांसद सुवास नेम्वाङको पार्थिव शरीरमा पूर्वराष्ट्रपति विद्यादेवी भण्डारीले राष्ट्रिय झण्डा ओढाएर सम्मान व्यक्त गरेकी छन् ।

पार्टी केन्द्रीय कार्यालय च्यासलमा नेम्वाङको पार्थिव शरीरमा भण्डारीले राष्ट्रिय झण्डा र एमाले अध्यक्ष केपी शर्मा ओलीले पार्टीको झण्डा ओढाएर सम्मान व्यक्त गरे ।

नेम्वाङको पार्थिव शरीर च्यासलको तुल्सीलाल हलमा श्रद्धाञ्जलीका लागि राखिएको छ । एमालेले नेम्वाङको सम्मानमा तीन दिनसम्म देशभरका सबै पार्टी कार्यालयमा पार्टी झण्डा आधा झुकाउने निर्णय गरेको छ । यस्तै, केन्द्रीय कार्यालय, प्रदेशिक कार्यालयहरु र इलाम जिल्ला पार्टी कार्यालयमा शोक पुस्तिकासमेत राख्ने निर्णय एमालेले गरेको छ ।

पार्टी र अन्तर्गतका सबै जनवर्गीय संगठनले तीन दिनसमम सबै औचापरिक कार्यक्रम स्थगित गरेको पनि ज्ञवालीले जानकारी दिए । “असोज २ गते उहाँको सम्मानमा पार्टी केन्द्रीय कार्यालयको आयोजनामा विशेष श्रद्धाञ्जली सभा आयोजना गरिनेछ,” ज्ञवालीले भने ।

सरकारले नेम्वाङलाई राजकीय सम्मान दिने निर्णय गरिसकेको छ । सोहीअनुसार नेपाली सेनाको टोलीले नेम्वाङको पार्थिव शरीर एमाले मुख्यालय च्यासल पु¥याएको थियो ।

नेम्वाङको आज बिहान निधन भएको हो । आजै बिहान बसेको मन्त्रिपरिषद्को आकस्मिक बैठकबाट नेम्वाङलाई राजकीय सम्मान र अन्त्येष्टिका दिन सार्वजनिक बिदा दिने निर्णय गरिएको छ । मन्त्रिपरिषद्ले राजकीय सम्मान दिने निर्णय गरेपछि पार्थिव शरीर व्यवस्थापनको जिम्मा नेपाली सेनाले लिएको हो ।