काठमाडौं । प्रधानमन्त्री पुष्पकमल दाहाल ‘प्रचण्ड’ सामु सोमबार विदेशस्थित नेपाली नियोगका प्रमुख र श्रम, रोजगार तथा सामाजिक सुरक्षा मन्त्रालयका कर्मचारीबीच आरोप प्रत्यारोप चल्यो ।

श्रम मन्त्रालयले आयोजना गरेको ‘श्रम आप्रवासनका सवालहरू र कूटनीतिक नियोगको भूमिका’ विषयक दुई दिने छलफल कार्यक्रममा आरोप प्रत्यारोप चलेको हो ।  

प्रधानमन्त्री प्रचण्डले वैदेशिक रोजगारीलाई व्यवस्थित बनाउन र मानव तस्करी रोक्ने उदेश्यले विदेशस्थित नेपाली १३ वटा नियोगका प्रमुखलाई काठमाडौं बोलाएका थिए ।

सोमबार काठमाडौंमा भएको छलफल कार्यक्रममा प्रधानमन्त्री प्रचण्डले करिब तीन घण्टा बिताएका थिए ।

उनले सुरुमै वैदेशिक रोजगारीमा जाने जनताले अब दुःख पाउन नहुने र त्यसलाई व्यवस्थित गर्न निर्देशन दिएका थिए ।

“जनताले धेरै दुःख पाए । अब हामीले केही डेलिभरी दिनुपर्छ । जनतालाई हामी केही गर्दैछौँ भन्ने सन्देश दिनुपर्छ,” कार्यक्रममा उपस्थित एकजना सहभागीले प्रधानमन्त्रीको भनाई उद्वृत गर्दै बाह्रखरीसँग भने, “जसरी हुन्छ मानवतस्करी रोक्नुपर्छ र वैदेशिक रोजगारीलाई व्यवस्थित बनाउनुपर्छ ।”

सोमबारको छलफलमा श्रम मन्त्रालयका पदाधिकारीले वैदेशिक रोजगारीका विषयलाई लिएर बारम्बार परराष्ट्र मन्त्रालय र अन्तर्गतका नियोगहरूलाई पत्राचार गर्दा त्यसको कुनै जवाफ नदिने गरेको आरोप लगाएका थिए ।

परराष्ट्र र नियोगले जवाफ नदिँदा कयौँ कामहरू रोकिने, ढिला हुने गरेको र अन्तत जनताले दुःख पाउने गरेको श्रमका पदाधिकारीले बताएका थिए ।

विशेषगरी ‘डिमाण्ड लेटर’का विषयमा पत्रकार गर्दा परराष्ट्र र नियोगले जवाफ नदिने तथा ढिलाइ गर्ने गरेको आरोप श्रमका पदाधिकारीको थियो ।

श्रमका पदाधिकारीले आरोपको खण्डन गर्दै परराष्ट र नियोगका प्रमुखहरूले नियत राखेर कुनै काम ढिला नगरिएको बताएका थिए ।

श्रमले कुनै एक नियोगसँग पत्रचार गरे पनि ती विषय सबै नियोगसँग सम्बन्धित हुने र सबैलाई सम्बोधन गरी निर्णय लिनुपर्ने भएकोले कहिलेकाहीँ जवाफ पठाउँदा ढिला हुने गरेको परराष्ट्रका पदाधिकारी तथा नियोग प्रमुखले जनाएका थिए ।

श्रम र परराष्ट्रका पदाधिकारीबीच आरोप प्रत्यारोप चल्दा प्रधानमन्त्री प्रचण्ड धैर्यताका साथ सुनिरहेका थिए ।

सोमबार १३ वटा नियोगका प्रमुखहरूले वैदेशिक रोजगारीका विषयमा आफूले भोगेका समस्या, त्यसको व्यवस्थापन र समाधनका विषयमा छुट्टाछुट्टै प्रिजेन्टेसन् गरेका थिए ।

सोमबारको कार्यक्रममा उपप्रधान तथा रक्षामन्त्री पूर्णबहादुर खड्का, परराष्ट्रमन्त्री एनपी साउद, श्रम, रोजगार तथा सामाजिक सुरक्षामन्त्री शरतसिंह भण्डारी, परराष्ट्र सचिव भरतराज पौड्याल, १२ श्रम गन्तव्य राष्ट्रस्थित १३ वटा नियोगका प्रमुख (राजदूत र महावाणिज्यदूत) सहभागी थिए ।

श्रम गन्तव्यलाई सुरक्षित बनाउन र मानव तस्करीलाई रोक्नका लागि मंगलबार पनि छलफल हुने जनाइएको छ । मंगलबारको कार्यक्रममा पनि प्रधानमन्त्री उपस्थित हुनेछन् ।