काठमाडौं । नेपालको विद्युतीय सवारी कम्पनी सुन्दर यातायातको ४९ प्रतिशत सेयर दुई युवा उद्यमीले खरिद गरेका छन् । यूएईको दुबई र हङकङमा व्यवसाय गरिरहेका अर्का उद्यमीलाई सुन्दर यातायातको ३८ करोड ९२ लाख रुपैयाँको सेयर बिक्री गरिएको हो ।

दुबईमा नेपाल मोबाइल हाउस र होटेल व्यवसाय गर्दै आएका स्याङ्जाका विशाल पण्डित र नेपालबाट पहिलोपटक हङकङमा हस्तकला निर्यात गर्नेमध्येका रुपन्देहीका व्यवसायी हर्क गुरुङले संयुक्त रूपमा कम्पनीको सेयर किनेका हुन् । पण्डितको मोबाइल हाउस व्यवसाय मकाउ, जर्मनी, कतारलगायत ६ देशमा फैलिएको छ । गुरुङले हङकङमा व्यवसाय गर्दै आएका छन् ।

उनीहरूले सुन्दर यातायातको मुख्य कम्पनीकै सेयर किनेका हुन् । सोही कारण उनीहरूले तीनै कम्पनी (सुन्दर यातायात, सुन्दर अटो इन्जिनियरिङ र सुन्दर ट्रेडर्स)को ४९ प्रतिशत सेयर स्वामित्व पाएको कम्पनीले जनाएको छ ।

सार्वजनिक विद्युतीय सवारीसाधन चलाइरहेको, दुईपांग्रे विद्युतीय सवारीको व्यापार गरिरहेको र नेपालमै पहिलोपटक चेसिस निर्मित विद्युतीय बाइक उत्पादन गरेको कम्पनीले व्यवसाय थप विस्तार गर्ने जनाएको छ ।

हाल कम्पनीका विभिन्न ६ ठाउँमा विद्युतीय चार्जिङ स्टेसन छन् । चार्जिङ स्टेसनको संख्या अझै बढाउँदै लैजाने र नेपालमै दुईपांग्रे विद्युतीय सवारीसाधन उत्पादन एवं एसेम्बलको कामलाई तीव्रता दिइने कम्पनीले जनाएको छ ।