काठमाडौं । काठमाडौंको भृकुटीमण्डमा भदौ २६ देखि ३१ गतेसम्म ‘नाडा अटोसो’ हुँदैछ ।  विगत तीन वर्ष रोकिएको नाडा अटो शोमा यसपटक विद्युतीय एवम् पेट्रोलियम गाडी, तीन पाङ्ग्रे तथा दुई पाङ्ग्रे सवारीसाधन, ढुवानीका साधन, स्पेयर पार्टस्, ब्याट्री र एसेसरिजलगायतको प्रदर्शनी रहनेछ ।

तर, अटो शोमा सबैभन्दा रोचक र आकर्षण भने विद्युतीय सवारीसाधनमा केन्द्रित रहने ठानिएको छ । ६ दिनसम्म चल्ने नाडा अटोमोबाइल्स एसोसिएसन अफ नेपालको यो १५औं संस्करण हो । झण्डै एक लाखले अवलोकन गर्ने र २० अर्ब रुपैयाँको कारोबार हुने अपेक्षा गरिएको अटो शो मा विभिन्न ब्रान्डका नयाँ सवारीसाधनहरु सार्वजनिक हुँदैछन् ।

१२० वटा स्टल रहने अटो शो मा १६ ब्रान्डका चार पाङ्ग्रे, २२ ब्रान्डका दुई पाङ्ग्रे र ७ ब्रान्डका लाइट कमर्सियल भेहिकल रहने नाडाले बताएको छ । नाडाका अध्यक्ष ध्रुव थापाले यस पटकको सोमा ऐतिहासिकरुपमा नयाँ दुई पाङ्ग्रे र चार पाङ्ग्रे सवारीसाधन सार्वजनिक हुने बताएका छन् ।

उनले भने, “अहिले ऐतिहासिकरुपमा सबैभन्दा बढी सवारीसाधन लञ्च हुन्छ । यस पटक नयाँ मोडलहरु र नयाँ प्रडक्टहरु पनि लञ्च भइरहेको छ । अटो शो मा नयाँ सहभागी हुनेको संख्या पनि धेरै छ ।”

नाडा अटो शोले केही नयाँ अपेक्षा जगाउने अपेक्षा उनले गरेका छन् । 

“बैंकहरु पनि निकै उत्साही छन् । हामीले अटोमोबाइललाई अलि सहजरुपमा गर्छाैँ भन्ने कुरा उहाँहरुको पनि छ । धेरै बैंक वित्तीय संस्था सहभागी हुन खोजेका छन् र व्यवसायी पनि मिलेर धेरै ठूलो अफर लिएर आइरहेका छन् यो पटक,” उनले भने ।

बैंकले सहज ब्याजदर र व्यवसायीले बिशेष अफर ल्याएका कारण राम्रो व्यापार हुने हुने विश्वास छ । “यो पटक लामो समयपछि अटो शो हुँदैछ । ठूलो अफरहरु र इतिहासमा सबैभन्दा ठूलो अफर यसपटक कम्पनीहरुले दिँदैछन् । त्यसैले अहिले नै लिए पनि वा भविष्यमा लिए पनि एक पटक भिजिट गर्न हाम्रो अनुरोध छ,” उनले भने ।

कुन कम्पनीको कस्तो ईभी आउँदैछ ?

सेरेस ईभी : एमडब्ल्यू वृद्धि अटोकर्पले नाडा अटो शोमा सबैभन्दा उच्च आकर्षणको विद्युतीय गाडी(ईभी) सार्वजनिक गर्ने भएको छ ।  कम्पनीले १५ लाख नेपाली रुपैयाँ आसपासमा सुरुवाती मूल्य रहने सेरेस ई–१ मोडलको गाडी सार्वजनिक गर्ने तयारी गरेको छ ।

चीन, इन्डोनेसियालगायत देशमा सार्वजनिक भइसकेको यो गाडीले मूल्यका हिसाबले नेपालमा आर्कषण पाउने देखिएको छ ।  सेरेस मिनी ईभी बेस र टप गरी दुई भेरियन्ट बजारमा आउँदैछ । यस्तै कम्पनीले ५० लाख रुपैयाँ आसपासमा सुरुवाती मूल्य रहने सेरेस ब्रान्डकै अर्काे ईभी सेरेस–३ ईभी पनि नाडा अटो शोमै सार्वजनिक गर्ने भएको छ । 

यो गाडीको पनि कम्फर्ट र प्रिमियम गरी दुई वटा भेरियन्ट रहेको छ ।

टेस्ला जित्ने नेटा

नेपालमा नेटाको आधिकारीक वितरक सीजी मोटर्सले नाडा अटो शोमा महत्वपूर्ण आर्कषणको ईभी सार्वजनिक गर्ने भएको छ । कम्पनीले नेटाका तीन नयाँ मोडलका गाडी सार्वजनिक गरिरहेको छ । अटो शो मा करिब ६ सय किलोमिटर रेन्जको ‘नेटा जीटी’ र ६१० किलोमिटर रेन्जको ‘नेटा यू प्रो’ ईभी सार्वजनिक हुँदैछ ।

सबैभन्दा आकर्षणका रुपमा कम्पनीले ‘नेटा एस’ ईभी सार्वजनिक गरिरहेको छ ।  ११०० किलोमिटर रेन्ज रहेको यो गाडी हाल नेपालमा उपलब्ध टेस्लाको टप भेरियन्ट भन्दा महँगो हुने कम्पनी स्रोतको दाबी छ । यसअघि नेपाली बजारमा नेटाको ‘नेटा भी’ ईभी रहेको छ ।

बीवाईडीको डल्फिन

अर्काे ईभी ब्रान्ड बीवाईडीले पनि नेपालमा नयाँ मोडल सार्वजनिक गर्ने तयारी गरेको छ ।  हाल फोटो र विशेष अभियान सञ्चालनमा राखेको बीवाईडीले ‘डल्फिन’ मोडलको ईभी सार्वजनिक गर्ने बताएको छ ।

फोटोमा हेर्दा स्टालिइस देखिने बीवाईडी डल्फिन ईभीको मूल्य, फिचर र भेरियन्ट भने नाडा अटोसोमा सार्वजनिक भएपछि नै थाहा हुनेछ । बीवाईडीको अट्टो ३ र ई ५ ईभी पहिलेदेखि नै बजारमा रहेको छ ।

स्काईवेलको प्रिमियम एसयूभी

नाडा अटो शोमा जी मोटर्सले नयाँ ईभी ब्रान्ड भित्र्याइरहेको छ । कम्पनीले स्काईवेल ब्रान्ड नेपाल भित्र्याइरहेको हो । ६२० किलोमिटर रेन्ज भएको ‘स्काईवेल ईटी–५’ प्रिमियम एसयूभी ईभी सार्वजनिक गर्ने कम्पनीले जनाएको छ ।

३० मिनेटमै ३० देखि ८० प्रतिशत चार्ज गर्न सकिने भनिएको यो गाडीको मूल्य भने अटो शोमै सार्वजनिक गरिने छ । यसबाहेक पहिलेदेखि नै बजारमा रहेका ईभी ब्रान्डहरुले आफ्ना गाडीमा बिशेष छुट र आर्कषक अफरहरु ल्याएका छन् ।