काठमाडौं । स्वास्थ्य तथा जनसंख्यामन्त्री मोहनबहादुर बस्नेत जनसंख्या र विकाससम्बन्धी अन्तर्राष्ट्रिय सम्मेलनमा भाग लिन इजिप्ट गएका छन् । मन्त्रालयका अतिरिक्त सचिव विकास देवकोटा र उनको परिवारसहितको टोली सोमबार बिहान त्यसतर्फ गएको हो ।

यही भदौ १९ देखि २२ गतेसम्म इजिप्टको राजधानी कायरोमा सम्मेलन हुनेछ । मन्त्री बस्नेतले नेपालले स्वास्थ्य अवस्था सुधारका पक्षमा चालेका कदम र चुनौतीका विषयमा मन्त्रीस्तरीय बैठकमा नेपालका तर्फबाट विचार व्यक्त गर्नेछन् ।

विश्व स्वास्थ्य संगठन (डब्ल्यूएचओ)को दक्षिणपूर्वी एसिया क्षेत्रीय निर्देशकको उमेदवार बनेका नेपालका जनस्वास्थ्यविज्ञ डा. शम्भु आचार्यको पक्षमा ‘लबिङ’ गर्ने पनि उनले प्रतिबद्धता जनाएका छन् । सो निर्वाचन आउँदो महिना हुँदै छ ।

मन्त्री बस्नेत भदौ २४ गते स्वदेश फर्कने सचिवालयले जनाएको छ ।