काठमाडौं । एसिया कप–२०२३ मा नेपालविरुद्धको खेल छोडेर भारत फर्किएका भारतीय टिमका बलर जसप्रीत बुमराहलाई पुत्रलाभ भएको छ ।

सोमबार भारतले नेपालविरुद्ध खेल्ने तालिका छ । बुमराह आइतबार श्रीलंकाबाट भारत फर्किएका थिए ।

२९ वर्षीय बुमराहले सामाजिक सञ्जालमार्फत पुत्रलाभको जानकारी दिएका हुन् । उनले टेलिभिजन प्रस्तोता सञ्जना गनेसनसँग विवाह गरेका थिए ।

बुमराहले फेसबुक पोस्टमा आमा र सन्तानको स्वास्थ्य अवस्थाबारे केही जानकारी दिएका छैनन् । उनले छोराको नाम अंगद जसप्रीत बुमराह राखेका छन् ।

“हाम्रो सानो परिवार बढेको छ र हाम्रो हृदय हामीले सोचेको भन्दा पनि भरिएको छ ! आज बिहान हामीले हाम्रो सानो केटा, अंगद जसप्रीत बुमराहलाई संसारमा स्वागत गर्‍यौँ । हामी निकै खुसी छौँ र जीवनको यो नयाँ अध्यायसँगै आउने सबै कुराप्रति प्रतीक्षित छौँ,” बुमराहले सामाजिक सञ्जालमा लेखेका छन् ।