काठमाडौं । नेकपा (एमाले) निकट अनेरास्ववियुले इन्जिनियरिङको शुल्क फिर्ता गर्नेगरी भएको सहमतिविरुद्ध प्रदर्शन गर्ने भएको छ ।

अनेरास्ववियुले भोलि (बिहीबार) बिहान प्रधानमन्त्री निवास बालुवाटा पुगेर त्रिवि पदाधिरीसँग सत्ता गठबन्धन निकट विद्यार्थी संगठनहरूले गरेको सहमतिपत्र जलाउने कार्यक्रम नै राखेको छ । अनेरास्ववियुले सहमतिपत्रलाई 'धोकापत्र' भनेको छ ।

अनेरास्ववियुका अध्यक्ष समिक बडालले शुल्क वृद्धिबारे आईओईले जवाफ दिनुपर्ने बताएका छन् । 

बुधबार त्रिभुवन विश्वविद्यालयका उपकुलपति धर्मकान्त बाँस्कोटा र शिक्षाध्यक्ष शिवलाल भुसालसहितका पदाधिकारीले विभिन्न विद्यार्थी संगठनका प्रतिनिधिसँग बुधबार शुल्क फिर्ता लिनेसहित पाँच बुँदे सहमति गरेका छन् ।

सहमति अनुसार विद्यार्थी प्रतिनिधिसहितको एक समिति गठन हुने छ । जसले सात दिनभित्र प्रतिवेदन पेस गर्ने छ । समितिले दिएको सुझावको आधारमा कायम गरिने शुल्कलाई लागु गर्न सबै पक्ष सहमत हुने भनिएको छ । 

शुल्क लागु गर्न सहमत भइसकेको अवस्थामा हाल स्थगित गरिएका प्रवेश परीक्षालगायत सबै कार्यक्रमहरू सञ्चालन गरिने छ । 

सहमतिसँगै विद्यार्थीहरूको आन्दोलन स्थगित भएको छ । तर, अनेरास्ववियुले भने सहमतिविरुद्ध नै प्रदर्शन गर्ने तयारी गरेको हो ।