काठमाडौं । नबिल बैंकका डेपुटी प्रमुख कार्यकारी अधिकृत (सीईओ) मनोज ज्ञवालीले निर्माण व्यवसायीलाई सरकारले पैसा दिन नसक्दा बैंकिङ प्रणालीमा पनि समस्या निम्तिने बताएका छन् ।
बुधबार काठमाडौंमा बाह्रखरी मिडियाले आयोजना गरेको 'निजी क्षेत्रको आवाज' बृहत् छलफल कार्यक्रममा कार्यपत्र प्रस्तुत गर्दै ज्ञवालीले यस्तो बताएका हुन् ।
"सरकारले पुँजीगत खर्च बढाउन सके अर्थतन्त्र चलायमान हुने हो । तर, निर्माण व्यवसायीको पैसा सरकारले दिन सकेको छैन । यसले बैंकिङ प्रणालीमा पनि असर गर्छ," उनले भने, "अर्थतन्त्रमा समस्या आएकै कारण सरकारले लक्ष्यअनुसार राजस्व उठाउन सकेन । राजस्वका दर बढाइएको छ । तर लक्ष्य भेट्न सकेन भने यसले समस्या निम्तिन्छ । राजस्व उठाउन व्यवसाय चल्नुपर्छ ।"
प्लस टू सक्ने बित्तिकै विदेशिने लहर बढेकोले पनि उद्योग व्यवसाय र बैंकिङ क्षेत्रमा नै समस्या निम्तिएको उनले बताए । यो अवस्थालाई रोक्न नसकिए देशको अवस्था केही वर्षमै नाजुक बन्नसक्ने उनको भनाइ छ ।
नयाँ व्यवसाय सञ्चालनमा नआउँदा पनि कर्जाको माग नभएको ज्ञावालीले बताए । यसले गर्दा अहिले बैंकमा तरलता सहज भएको पनि उनको भनाइ छ ।
